Թուրքիայի նախագահը պատրաստ է «անհրաժեշտության դեպքում» երկարաձգել արտակարգ դրության ռեժիմը
Թուրքիայի նախագահ Ռեջեփ Թայիփ Էրդողանը, ով երկրում իշխող «Արդարություն և զարգացում» կուսակցության (AKP) կողմից առաջադրվել է հունիսի 24-ին կայանալիք նախագահական ընտրություններում, խոստացել էր, որ ընտրություններից հետո իրենց առաջին գործը լինելու է արտակարգ դրության ռեժիմի դադարեցումը:
Թուրքիայի նախագահը պատրաստ է «անհրաժեշտության դեպքում» երկարաձգել արտակարգ դրության ռեժիմը
ՍՏԵՓԱՆԱԿԵՐՏ, հունիսի 18, ԱՐՑԱԽՊՐԵՍ-ԱՐՄԵՆՊՐԵՍ: Այս մասին հայտնում է թուրքական t24.com.tr-ն:
Մոռանալով խոստումը՝ Էրդողանն այս անգամ հայտարարել է, որ արտակարգ դրության ռեժիմը կրկին կարող է երկարաձգվել, եթե «ահաբեկչության դեմ պայքարի արդյունավետության անհրաժեշտություն» լինի:
Դիմելով հասարակությանը՝ Էրդողանը խոստացել է նաև, որ արտակարգ դրության ռեժիմը չի անդրադառնալու երկրի և պետական մարմինների բնականոն կյանքի վրա:
Նա հայտարարել է, որ Թուրքիան երբեք չպետք է թուլացնի զգոնությունը ահաբեկչության դեմ պայքարում և որ, եթե անհրաժեշտ լինի արտակարգ դրություն մտցնելը, խնդիր չի լինի:
«Արտակարգ դրության ռեժիմ մտցնելը խնդիր չէ, եթե անհրաժեշտ լինի, կրկին կմտցնենք»,-հայտարարել է Էրդողանը:
Թուրքիայում առաջին անգամ արտակարգ դրություն է հայտարարվել 2016 թվականի հուլիսի 15-ի ռազմական հեղաշրջման փորձից հետո` հուլիսի 21-ին: 90 օր շարունակվող արտակարգ դրությունը հետագայում երկարաձգվել էր ևս 6 անգամ: Վերջին անգամ հայտարարված արտակարգ դրության ժամկետը ավարտվել է 2018 թվականի ապրիլի 19-ին և խորհրդարանի որոշմամբ կրկին երկարաձգվել:
Իշխանություններն արտակարգ դրության անհրաժեշտությունը պայմանավորում են ահաբեկչական խմբավորումների հետ պայքարելու հրամայականով:
Եթե արտակարգ դրության ռեժիմը կրկին երկարաձգվի, ապա դա կլինի 8-րդ երկարաձգումը: