Իվանյանի անվան վարժարանում անց է կացվել ռազմամարզական սպարտակիադա
Ստեփանակերտի Ք. Իվանյանի անվան ռազմամարզական վարժարանում օրերս անց է կացվել ռազմամարզական սպարտակիադա, որի նպատակն է եղել սաների շրջանում ամրապնդել ուսումնական տարվա ընթացքում ձեռք բերած ռազմակիրառական և մարզական ունակություններն ու կարողությունները:
Իվանյանի անվան վարժարանում անց է կացվել ռազմամարզական սպարտակիադա
ՍՏԵՓԱՆԱԿԵՐՏ, հունիսի 18, ԱՐՑԱԽՊՐԵՍ-ՄԱՐՏԻԿ: Անցկացված մրցաշարին վարժարանի սաները մասնակցել են թիմային ու անհատական ձևաչափով: Սա նույնպես կոլեկտիվ մտածելակերպի զարգացման, միջանձնային առողջ փոխհարաբերությունների և համառ մրցապայքարի ապահովման կարևոր բաղադրիչներից մեկն է: Վարժարանի սաները խոստովանում են, որ, իհարկե, առաջնային տեղեր զբաղեցնելու ձգտմամբ են մոտենում վարժաձևերին, սակայն կարևորը հաղթելը չէ: Սա մի միջոցառում է, որը թույլ է տալիս ամփոփել մեկ տարվա ձեռքբերումները և տեսական ու գործնական ունակությունները ցուցադրել ակտիվ մրցապայքարի միջոցով:
Ուսումնական կետերում վարժարանի սաները նաև ռազմակիրառական մարզաձևերից են մրցել: Ավտոմատի ոչ լրիվ քանդել հավաքելու, պահեստատուփի լիցքավորման, նռնակի նետման և օդամղիչ հրացանով հրաձգության մեջ վարժարանի սաներն արդեն հմտացել են, աղջիկները նույնպես մրցաշարի ընթացքում ապացուցել են, որ իրենք ևս օրեցօր ավելի ուժեղ և ճկուն են գործում:
Վարժարանի ֆիզպատրաստության պետը սպարտակիադայի արդյունքներից և մասնակիցների ֆիզիկական ու ռազմակիրառական որակներից գոհ է: Վստահեցնում է, որ բացի լավագույններին բացահայտելուց և վերջիններիս ընդունակությունները ստուգելուց, սա նաև լավ առիթ էր նախանշելու հաջորդ ուսումնական տարվա համար անհրաժեշտ անելիքները:
Սպարտակիադայի ավարտին անց է կացվել հանդիսավոր միտինգ, որին ներկա էին նաև վարժարանի սաների ծնողները: Վարժարանի պետի հրամանով անհատական ու թիմային մրցապայքարում լավագույն արդյունքներ ցուցաբերած և մրցանակային տեղեր զբաղեցրած թիմերն ու մասնակիցները արժանացել են գավաթների, հուշամեդալների և պատվոգրերի: