Այսօր՝ հունիսի 23-ին, ԱՀ էկոնոմիկայի և արտադրական ենթակառուցվածքների նախարարության նախաձեռնությամբ Ստեփանակերտում տեղի է ունեցել «Արցախի բրենդինգը. Զարգացման հեռանկարներ. Գաղափարից դեպի մարմնացում. Միջազգային փորձը» թեմայով սեմինար-քննարկում:
Ստեփանակերտում տեղի է ունեցել արցախյան բրենդի ձևավորման և զարգացման վերաբերյալ սեմինար-քննարկում
ՍՏԵՓԱՆԱԿԵՐՏ, հունիսի 23, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ ներկաներին ողջունել է Հայաստանի Գովազդային Խորհրդի և «Անտարես» մեդիահոլդինգի ղեկավար Արմեն Մարտիրոսյանը՝ նշելով, որ իր գործընկերների հետ Ստեփանակերտ կատարած այցի նպատակն է ավարտին հասցնել Արցախի բրենդի իրագործման աշխատանքները:
«Սկսած 2010 թվականից՝ միջազգային տարբեր ընկերությունների ղեկավարներ խմբերով այցելում են Արցախ: Հայաստանի Գովազդային Խորհուրդը տարիներ շարունակ անց է կացրել «Պոպոք» գովազդային միջազգային փառատոնը, որից հետո մասնակիցներին առաջարկվում էր մի քանի օրով այցելել Արցախ: Այդ խմբերը հարցնում էին՝ ինչու Արցախը չունի բրենդ: Դրանից էլ սկսվեց ծրագրի մեկնարկը: ԱՀ կառավարության հետ քննարկումից հետո բրենդինգով զբաղվող ընկերություններին մենք առաջարկել ենք որոշ բլուրներ Արցախում կոչել իրենց ընկերությունների անունով, որը կլինի փոխշահավետ համագործակցություն»,- ասել է Ա. Մարտիրոսյանը՝ հավելելով, որ Արցախի բրենդի ստեղծման հարցում շատ կարևոր է նաև արցախցու կարծիքը:
Նրա խոսքով՝ ցանկացած տարածքային բրենդի համար տվյալ երկրի ներկայացուցիչը ինքը պետք է լինի կրողն այդ արժեհամակարգի:
«Տարածքային բրենդինգը պետք է լինի ամենաազնիվը և մոտիկը ճշմարտությանը: Այս առումով կարևորվում է Արցախի բրենդի նման տարբերակի ստեղծումը»,- ավելացրել է Ա. Մարտիրոսյանը:
«Prime Commercial» գովազդային գործակալության ղեկավար Սամվել Սահակյանն էլ անդրադարձել է տարածաշրջանի տուրիստական գրավչությանը՝ դրական եւ բացասական կողմերով, ինչպես նաև բրենդինգի զարգացման համար օգտագործվող հիմնական գործիքներին:
Հանդիպման ընթացքում մասնակիցների կողմից հնչեցվել են տարբեր հարցեր, եղել առաջարկություններ:
