Հադրութում կայացել է նկարչական երկրորդ միջազգային սիմպոզիումի փակման արարողությունը
Այսօր Հադրութի շրջվարչակազմի աշխատակազմի մշակույթի և երիտասարդության հարցերի բաժնի նախաձեռնությամբ «Տյաք» պետական պատմամշակութային արգելոցում կայացել է հունիսի 22-ից շրջկենտրոնում մեկնարկած «Դիզակի գույները» խորագրով նկարչական երկրորդ միջազգային սիմպոզիումի փակման արարողությունը:
Հադրութում կայացել է նկարչական երկրորդ միջազգային սիմպոզիումի փակման արարողությունը
ՍՏԵՓԱՆԱԿԵՐՏ, հունիսի 29, ԱՐՑԱԽՊՐԵՍ: Սիմպոզիումին Արցախից, Հայաստանից և Ռուսատանի Դաշնությունից մասնակցել է 17 նկարիչ:
«Արցախպրես»-ի թղթակցի հետ զրույցում Հադրութի շրջվարչակազմի աշխատակազմի մշակույթի և երիտասարդության հարցերի բաժնի վարիչ Երազիկ Հայրիյանն ասել է, որ «Դիզակի գույները» խորագրով նկարչական երկրորդ միջազգային սիմպոզիմի նկարիչները նկարել են ավելի քան 200 կտավ:
Նրա խոսքով՝ նկարիչները կտավներից 61-ը նվիրել են հադրութցիներին. դրանք հետագայում կցուցադրվեն «Տյաք» պետական պատմամշակութային արգելոցում նախատեսված կերպարվեստի թանգարանում:
«Մեզ համար մեծ պատիվ է, որ հենց Հադրութում է կազմակերպվում նման ձևաչափով միջոցառում, և որ այս տարի այն արդեն միջազգային է դարձել: Մեր շնորհակալությունն ենք հայտնում սիմպոզիումի մասնակիցներին, ինչպես նաև նկարիչներ Հովիկ Գասպարյանին և Գևորգ Բաբախանյանին, որոնց աջակցությամբ կարողացանք հրավիրել սիմպոզիումի մասնակիցներին»,-ավելացրել է Ե. Հայրիյանը:
Խոսելով անցած տարվա առաջին սիմպոզիումի մասնակիցների մասին՝ մեր զրուցակիցն ասել է, որ 2017 թվականին Արցախից և Հայաստանից մասնակցել է 10 նկարիչ: Տպավորված լինելով Արցախի հարուստ, հեքիաթային բնությամբ` մասնակիցները 33 նկար են նվիրել Հադրութին:
Նկարչական երկրորդ միջազգային սիմպոզիումի մասնակիցները Հադրութի շրջվարչակազմի աշխատակազմի մշակույթի և երիտասարդության հարցերի բաժնի կողմից արժանացել են դիպլոմների և խորհրդանշական նվերների:
Նշենք, որ «Դիզակի գույները» նկարչական երկրորդ միջազային սիմպոզիումի կազմակերպմանն աջակցել են նաև ԱՀ մշակույթի, երիտասարդության հարցերի և զբոսաշրջության նախարարությունը, «Արարատ» հիմնադրամը, «Ավան Շուշի» հոթելը, «Կատարո» գինու գործարանի տնօրինությունը և մոսկովյան «ժամ» ամսագիրը: