ՍՏԵՓԱՆԱԿԵՐՏ, հուլիսի 3, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նա ասուլիսին ամփոփել է իր ղեկավարման 9 ամիսների ընթացքում նախարարությունում տարված աշխատանքները և ներկայացրել հրաժարականի պատճառը:

«Հրաժարականի մասին տեղեկատվություն հրապարակել եմ իմ ֆեյսբուքյան էջում՝ այնտեղ նշելով, որ գործունեությունս շարունակելու եմ հանրային դաշտում: Գտնում եմ, որ այն տարիներ շարունակ խաթարված է եղել և պետք է անել հնարավորը, որպեսզի դաշտը կայանա»,- ասել է Ս. Շահվերդյանը:

ՄԵՀԶ նախկին նախարարը, ով դեռևս 2008 թվականից ԱՀ կառավարությանն առընթեր զբոսաշրջության և պատմական միջավայրի պահպանության վարչության պետն էր, կատարված աշխատանքները ներկայացրել է ըստ ոլորտների:

«10 տարիների ընթացքում մենք արտերկրում կարողացանք ապահովել Արցախի ներկայությունը: 2008 թ.-ին ունեցանք ընդամենը 4000 զբոսաշրջիկ: Մեր աշխատանքների շնորհիվ այդ թիվը տարեցտարի աճել է, և 2017 թվականին կազմել շուրջ 28000: 2018-ի առաջին 5 ամսվա արդյունքներով արձանագրել ենք 105 տոկոս զբոսաշրջիկների աճ, որն աննախադեպ է»,- մանրամասնել է Ս. Շահվերդյանը:

Նրա խոսքով՝ 9 ամսվա ընթացքում մշակույթի բնագավառում իրենց հիմնական խնդիրներից մեկն էր մշակույթի տարանջատումը ժամանցից:

«Գործունեության առաջին իսկ օրվանից կարևորություն է տրվել մայր թատրոնի շենքի վերականգնման և դերասանական կազմի համար բավարար պայմաններ ապահովելու հարցին: Սկսվել են թատրոնի վերականգնման նախագծային աշխատանքները, ինչպես նաև հայաստանյան թատերային կազմակերպությունների դրամահավաքը, և արդեն հավաքագրվել է շուրջ 3 միլիոն դրամ: Մեր նպատակն էր թատրոնի վերականգնումն իրականացնել համաժողովրդական ջանքերով, ճիշտ այնպես, ինչպես կառուցվել էր 1952 թվականին»,- նշել է Ս. Շահվերդյանը:

Նախկին նախարարն իրականացված ծրագրերից առանձնացրել է վերջերս գործարկված Artsakh.Travel կայքը և «Այցետոմս» մշակութային անոնսը, որը պարբերաբար իրազեկում է հանրությանն առաջիկայում կայանալիք միջոցառումների մասին:

Ս. Շահվերդյանը անդրադարձել է նաև ընթացիկ տարվա օգոստոսի երկրորդ կեսին Շուշիում կայանալիք Artsakh Music Fest-ի նախապատրաստական աշխատանքներին:

Նա համոզմունք է հայտնել, որ նորանշանակ ՄԵՀԶ նախարար Լեռնիկ Հովհաննիսյանն ավարտին է հասցնելու մեկնարկած ծրագրերը:

Մամուլի ասուլիսին Ս. Շահվերդյանը պատասխանել է լրագրողների կողմից հնչեցված հարցերին: