ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանի հրավերով նախօրեին Արցախ են ժամանել Արցախի Հանրապետության Մերձավոր Արևելքում մշտական ներկայացուցիչ Կարո Քեբաբջյանն ու լիբանանցի գործարար, Gardenia Grain D’or ընկերության հիմնադիր Նիկոլյա Ժորժ Աբու Ֆայսալը:
Արցախում է լիբանանցի գործարար Նիկոլյա Ժորժ Աբու Ֆայսալը
ՍՏԵՓԱՆԱԿԵՐՏ, հուլիսի 9, ԱՐՑԱԽՊՐԵՍ: Այս մասին ‹‹Արցախպրես››-ին տեղեկացրին ԱՀ էկոնոմիկայի և արտադրական ենթակառուցվածքների նախարարությունից՝ մանրամասնելով, որ հանդիպմանը նախարար Լևոն Գրիգորյանը շնորհակալություն է հայտնել հյուրերին հրավերը ընդունելու համար և նշել, որ նախարարությունը միշտ պատրաստ է աջակցել նոր ներդրումների և ծրագրերի իրականացմանը: Քննարկվել են նաև Արցախի Հանրապետությունում ներդրումային միջավայրի պոտենցիալներն ու հնարավորությունները:
Աղբյուրի հաղորդմամբ՝ այնուհետև հյուրերն էկոնոմիկայի և արտադրական ենթակառուցվածքների նախարարի ուղեկցությամբ այցելել են Արցախի մի շարք արտադրական ձեռնարկություններ: Նրանք, շփվելով Արցախի արտադրողների հետ, հնարավորություն են ունեցել մոտիկից ծանոթանալու տեղական հումքով արտադրված ապրանքատեսակների արտադրության ընթացքին ու առաջիկա ծրագրերին:
Լուսանկարները՝ ԱՀ էկոնոմիկայի և արտադրական ենթակառուցվածքների նախարարության
