Նախօրեին ԱՀ գյուղատնտեսության նախարար Ժիրայր Միրզոյանն այցելել է «Էրիզ գրուպ» ընկերության Մարտունու շրջանի Բերդաշեն համայնքում գտնվող հնդկացորենի վերամշակման արտադրամաս:
Բերդաշենում հիմնվել է հնդկացորենի վերամշակման արտադրամաս
ՍՏԵՓԱՆԱԿԵՐՏ, հուլիսի 11, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Ժիրայր Միրզոյանը տեղում ծանոթացել է արտադրամասի, պայմաններին, արտադրական հզորությանն և հնարավորություններին, ինչպես նաև տեղեկացել արտադրամասի առաջիկա ծրագրերի և անելիքների վերաբերյալ:
«Էրիզ գրուպ» ընկերության տնօրեն Սերգեյ Գրիգորյանը, ներկայացնելով արտադրամասի արտադրական հնարավորությունները, իր խոսքում ասաց, որ այն ներառում է հնդկացորենի վերամշակման բոլոր գործառույթները՝ հումքի ձեռք բերումից մինչև պատրաստի արտադրանքի ստացում:
«Արտադրամասի ստեղծման գաղափարը առաջացել է նախորդ տարում, իսկ արդեն սարքավորումների տեղակայման գործընթացը կատարել ենք այս տարվա ապրիլ-մայիս ամիսներին: Այս պահի դրությամբ փորձնական վերամշակել ենք 6-7 տոննա հնդկացորեն, բայց նշեմ, որ արտադրամասն հնարավորություն ունի մեկ օրում տալ 15 տոննա արտադրանք»,- նշեց Ս. Գրիգորյանը:Նա ընդգծեց, որ այս տարի շուկա դուրս գալու խնդիր չեն դրել. դա կանեն հաջորդ տարիների ընթացքում, երբ հզորացնեն արտադրամասը և մեծացնեն արտադրական ծավալները:
«Կարծում եմ սա նաև հնարավորություն և վստահություն կհաղորդի հողագործներին՝ մեծ ծավալներով զբաղվելու հնդկացորենի մշակմամբ»,- ասաց Ս. Գրիգորյանն, հավելելով, որ արտադրամասն այս պահին ունի յոթ աշխատող:
ԱՀ գյուղնախարար Ժիրայր Միրզոյանը անդրադառնալով արտադրամասի գործունեությանը նշեց, որ այն կարևոր ենթակառուցվածք է Արցախի գյուղատնտեսության համար:
«Մեզ համար մեծ ուրախություն է ունենալ Բերդաշենի տարածքում նման արտադրամաս: Կարծում եմ, որ առաջիկայում մի քանի անգամ կավելացվի արտադրական հզորությունը: Ինչը նաև հնարավորություն կտա հանրապետությունում մեծացնելու հնդկացորենի ցանքատարածությունները: Առաջիկայում այդ ուղղությամբ մենք հատուկ աշխատանք պետք է կատարենք»,- ասաց նախարարը:
Ժ. Միրզոյանը նկատեց, որ մինչ այս, գարնանացան մշակաբույսերից տեղում մթերելու հնարավորություն էր տրվում միայն յուղատու մշակաբույսերին՝ հլածուկ, սոյա, արևածաղիկ, կտավատ: Նրա խոսքով հաջորդ դաշտավարական փուլում հատուկ կարևորություն է տրվելու նաև հնդակացորենի մշակությանը՝ հողօգտագործողներին ընձեռելով տեղում բերքի մթերման հնարավորություն:
