ՍՏԵՓԱՆԱԿԵՐՏ, հուլիսի 11, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «էկոտուրիզմն Արցախում» նախաձեռնող խմբի ղեկավար Սամվել Միրզախանյանը՝ մանրամասնելով, որ փառատոնն իրականացվելու է «Հզոր Հաթերք» ծրագրի շրջանակներում, ԱՀ մշակույթի, երիտասարդության հարցերի ու զբոսաշրջության նախարարության և Մարտակերտի շրջվարչակազմի աջակցությամբ:

 

Նրա խոսքով՝ փառատոնի մեկնարկը լինելու է ժամը 12:00-ին, որի ընթացքում Արցախի տարբեր մասերից Հաթերք ժամանած հմուտ մասնագետները կծանոթացնեն հյուրերին ժենգյալով հաց պատրաստելու առանձնահատկություններին և գաղտնիքներին։ 

 

«Տոնական սեղանի անպակաս մասը կկազմեն վիլսալին, կաթնաշոռով հացը, գինին։ Հյուրերը հնարավորություն կունենան փորձելու ազգային ուտեստների տեսականին (կորկոտ, խաշիլ, խաշլամա, լոբի, տապակած կանաչիներ)։ Այս ամենը կուղեկցվի կենդանի երաժշտությամբ, ազգային երգ ու պարով, արտասանություններով։ Ելույթ կունենան նաև Հաթերքի միջնակարգ դպրոցի և մանկապարտեզի սաները։

Փառատոնին կլինի Հաթերքում արտադրված բնական սննդի՝ “Haterk Food"-ի ցուցահանդես, հյուրասիրություն և վաճառք։ Փառատոնից հետո կլինի էքսկուրսիա համայնքի տարածքում(այցելություն՝ Հայրենական մեծ պատերազմի զոհերին նվիրված հուշահամալիր, «Սուրբ Նշան» խաչքար, «Սուրբ Մարիամ Աստվածածին» եկեղեցի, Հաթերքի եղբայրական գերեզմանատուն և արցախյան գոյամարտի զոհերին նվիրված հուշարձան)»,- մանրամասնել է Ս. Միրզախանյանը:

 

Անդրադառնալով տոմսեր ձեռք բերելու տարբերակներին՝ մեր զրուցակիցը նշել է, որ ցանկացողները փառատոնի մուտքի տոմսերը կարող են գնել տեղում. 15 և բարձր տարիքային խմբի անձանց համար մուտքը 1000 դրամ է, 10-14 տարեկանների համար՝ 500 դրամ, իսկ մինչև 10 տարեկանների համար անվճար է ( ֆինանսավորվել է «Հին Թոնրատուն» հյուրատան կողմից):

Մուտքի տոմսերը արժեքի մեջ ներառում են մասնակցությունը փառատոնին, համերգային մասը և էքսկուրսիան: Սպասվում են նաև հաճելի անակնկալներ։ Փառատոնի բոլոր մասնակիցները կստանան արժեքավոր նվերներ «Haterk Food»-ի և «Հաթերք» հյուրատան կողմից։

 

Ս. Միրզախանյանի խոսքով՝ հուլիսի 15-ին տարբեր վայրերից կգործի երկկողմանի տրանսպորտ դեպի Հաթերք։

 

Այսպես՝ առաջին երթուղու՝ Մարտակերտ-Հաթերք-Մարտակերտ երթևեկության արժեքը կկազմի 1600 դրամ: Մարտակերտի շրջվարչակազմի կողմից 50 անձի համար ֆինանսավորվել է 1100 դրամ, իսկ մնացած 500-ը կվճարեն մասնակիցները։

Տոմսերը Մարտակերտ քաղաքից ցանկացողները կարող են ձեռք բերել շրջվարչակազմի մշակույթի բաժնից, կամ զանգահարել 047 42-18-10 հեռախոսահամարին։ Ավտոբուսները կշարժվեն շրջվարչակազմի շենքի դիմացից, 09:30-ին։

 

Երկրորդ՝ Ստեփանակերտ-Հաթերք-Ստեփանակերտ երթուղու արժեքը 2400 դրամ է: ԱՀ գյուղի և գյուղատնտեսության աջակցության հիմնադրամի կողմից 150 անձի համար, ևս 20 անձի համար Արցախ ՀԷԿ ՓԲԸ-ի կողմից ֆինանսավորվել է 1400 դրամը. մնացած 1000 դրամը կվճարեն մասնակիցները։

Տոմսերը Ստեփանակերտ քաղաքում վաճառվում են «Արմենիա» հյուրանոցի դիմացի զբոսաշրջային տեղեկատվական կենտրոնում: Ձեռք բերել ցանկացողները կարող են զանգահարել նաև 097 39-91-75 հեռախոսահամարին։ Ավտոբուսները կշարժվեն հանրապետության հրապարակից 09.00-ին։

 

Երրորդ՝ Երևան-Դադիվանք-Հաթերք-Երևան՝ երթևեկության արժեքը 12 000 դրամ է: «Հաթերք» հյուրատան կողմից 120 անձի համար ֆինանսավորվել է 3000 դրամ, իսկ մնացած 9000-ը կվճարեն մասնակիցները։

 

Տրանսպորտի և գիշերակացի հետ կապված հարցերի դեպքում ցանկացողները կարող են զանգահարել 097 34-15-05 հեռախոսահամարին։

Երևանից ավտոբուսները կշարժվեն վաղ առավոտյան՝ ժամը 06.30 ին։ (Նույն օրը կգան և հետ կվերադառնան։ Երեկոյան 10.00-ին կլինեն Երևանում) :