Իսրայելի վարչապետ Բենյամին Նեթանյահուն պատասխանել է Երուսաղեմի Հայ Պատրիարք Ամենապատիվ Տ. Նուրհան Արք. Մանուկյանի նամակին:
Իսրայելի վարչապետը պատասխանել է հայ պատրիարքի նամակին
ՍՏԵՓԱՆԱԿԵՐՏ, հուլիսի 14, ԱՐՑԱԽՊՐԵՍ: Ֆեյսբուքյան իր էջում գրել է Երուսաղեմի հայոց պատրիարքարանի դիվանապետ Հովնան Բաղդասարյանը։
Բ. Նեթանյահուին ուղարկված նամակը ստորագրվել էր Երուսաղեմի Հայ և Հույն Պատրիարքների և Սուրբ Երկրի Քուստոսի կողմից հունիսի 18-ին:
Նամակում Հոգևոր Պետերը իրենց մտահոգությունն են հայտնում եկեղեցապատկան կալվածքների վերաբերյալ Քնեսետում շրջանառվող նախագծի մասին, որը շուտով պիտի ուղարկվեր Նախարարների Խորհրդի քննարկման: Նրանք նամակում իրենց հիասթափությունն են հայտնում, որ հակառակ փետրվարին վարչապետի կողմից տրված հավաստիացմանը, թե նախագծի քննարկումը սառեցվում է, այն շարունակվում է քննարկվել Քնեսետում:
«Իր պատասխան նամակում, տիար Նեթանյահուն հավաստիացնում է Երուսաղեմի Հայ Պատրիարքին և գրում է, որ թելադրել է ետ կանչել վերոհիշյալ նախագիծը քննարկումից և հանձնարարել է նախարար Ցախի Հանեգբիին հանդիպել Պատրիարք Սրբազան Հոր հետ` խնդրին լուծում գտնելու համար»,- գրել է Հովնան Բաղդասարյանը: