2018 թվականի պատրաստության պլանի համաձայն` Պաշտպանության բանակի զորամասերում մեկնարկել են ձմեռային ուսումնական փուլի ամփոփիչ ստուգումները: Ամփոփիչ ստուգումները մեկնարկեցին նաև գնդապետ Արտյոմ Առաքելյանի հրամանատարությամբ գործող զորամասում:
Մեկնարկել են ձմեռային ուսումնականի ամփոփիչ ստուգումները
ՍՏԵՓԱՆԱԿԵՐՏ, հուլիսի 16, ԱՐՑԱԽՊՐԵՍ-ՄԱՐՏԻԿ: Յուրաքանչյուր ուսումնական փուլի ավարտին իրականացվող ամփոփիչ ստուգումները Պաշտպանության բանակում իրականացվող ստուգման ձևերից ու մեթոդներից մեկն են, որոնց ընթացքում ստուգվում են ուսումնական փուլի ընթացքում զինծառայողների ձեռք բերած գիտելիքները, կատարած աշխատանքները, զորքերի և նրանց ղեկավար մարմինների պատրաստականությունը, զորամասերի և ստորաբաժանումների ներդաշնակման աստիճանը, կարգապահության վիճակը և զորամասի մարտունակությունն ընդհանրապես:
Ստուգումները հնարավորինս օբյեկտիվորեն անցկացնելու և նկատված թերությունները վեր հանելու նպատակով մի շարք զորամասերում դրանք իրականցնում էին փոխգործակցության շրջանակներում Պաշտպանության բանակ այցելած զինված ուժերի հանձնաժողովականները` գեներալ-մայոր Անդրանիկ Մակարյանի նախագահությամբ:
«Բանակի մարտունակությունը, որը մեր երկրի անվտանգության ապահովման թիվ մեկ երաշխիքն է, որոշվում է անձնակազմի առկայությամբ, սպառազինության և տեխնիկայի առկայությամբ, բոլոր տեսակի նյութատեխնիկական ապահովման միջոցառումների լիակատար իրականացմամբ, բայց այս ամենը ոչինչ չարժեն, եթե մենք չունենանք ուսուցանված զորք` բառիս բուն իմաստով: Այս ստուգումները և մեր ամենօրյա ծառայողական գործունեության հիմնական խնդիրը զորքին ուսուցանելն է և պատրաստելը այն բոլոր մարտահրավերներին, որոնց մենք պետք է պատրաստ լինենք և որոնց մենք առնչվում ենք ամեն օր: Կարևոր է նաև այն հանգամանքը, որ հայկական զինված ուժերում յուրաքանչյուր վեց ամիսը մեկ անգամ իրականացնելով զորակոչ և զորացրում, ստեղծում ենք ուժեղ և հարուստ մարտական փորձ ունեցող զորահավաքային ռեսուրսներ, որը շատ կարևոր է մեր երկրի անվտանգությունը այսօր, վաղը և ընդմիշտ ապահովելու համար:
Ինչ վերաբերում է նախնական արդյունքներին, ապա կարևոր է, որ բոլոր ոլորտներում արձանագրվել են դրական արդյունքներ: Բայց մենք պետք է անդադար պատրաստվենք, կատարելագործենք մեր ունակությունները, որպեսզի ունենանք տեխնիկական միջոցները կիրառելու համար ուսուցանված և իրենց առաջադրված խնդիրները կատարելու պատրաստ զինվորական անձնակազմ` սկսած ամենաբարձր պաշտոնատար անձից մինչև առաջին գծում կանգնած շարքային զինվորը»,-մեզ հետ զրույցում ասաց ՀՀ ԶՈՒ մարտական պատրաստության վարչության պետ, Գլխավոր շտաբի պետի տեղակալ, գեներալ-մայոր Անդրանիկ Մակարյանը:
Հետևելով քննությունների ընթացքին` նկատելի էր, որ ինչպես հրամկազմի, այնպես էլ ժամկետային զինծառայողների մոտ առկա են պատրաստակամության բարձր մակարդակ, բարոյակամային անհրաժեշտ հատկանիշները: Անձնակազմը ժամանակին պատրաստվել և ձգտում էր հանձնաժողովականներին ցուցադրել ուսումնական փուլի ընթացքում ձեռք բերած ունակությունները, ինչը առաջադրված խնդիրները գործնականում կատարելու գրավականն է:
«Քննությունները մեզ համար շատ կարևոր են, քանի որ դրանք մեր փորձն ու ունակությունները դրսևորելու հնարավորություն են տալիս: Եթե մենք ցանկանում ենք իմանալ, թե իրականում ինչի ենք ունակ պատերազմի դաշտում, ապա այսօր դա պետք է ապացուցենք ստուգումների ընթացքում: Եվ եթե մենք կարողանանք գերազանց գնահատական ապահովել, ապա կարող ենք վստահ լինել, որ նույնը կկարողանանք կատարել մարտական գործողությունների ժամանակ: Այս առումով սա բացառիկ հնարավորություն է բոլորիս համար: Գիտակցելով այս ամենը` բոլոր զինծառայողները ուժ ու եռանդ չեն խնայում ամառվա այս տապին բարձր գնահատական ապահովելու, ասել է թե` գործնականում առաջադրված խնդիրը կատարելու համար»,-մեզ հետ զրույցում ասաց շարքային Դավիթ Լևոնյանը` վստահություն հայտնելով , որ հուսախաբ չեն անի հրամանատարության սպասելիքները:
Ինչ վերաբերում է ամփոփիչ ստուգումների վերջնական արդյունքներին, ապա դրանք կամփոփվեն ավելի ուշ, և տարեվերջին ընդհանրացնելով կատարված աշխատանքները, յուրաքանչյուրը կգնահատվի ըստ արժանվույն:
Հրայր Փաշայան
