Այսօր՝ հուլիսի 16-ին, ԱՀ ֆինանսների նախարարությունում տեղի է ունեցել հարկային համակարգի բարեփոխումների հայեցակարգի հանրային քննարկումների ամփոփիչ փուլը:
Հարկային մարմնի գերակա խնդիրն է ունենալ գործարար միջավայրի բարելավմանը նպաստող համակարգ. Արթուր Հարությունյան
ՍՏԵՓԱՆԱԿԵՐՏ, հուլիսի 16, ԱՐՑԱԽՊՐԵՍ: ‹‹Արցախպրես››-ի թղթակցի հաղորդմամբ՝ քննարկմանը ներկա ԱՀ ֆինանսների նախարար Արթուր Հարությունյանն իր խոսքում ասել է, որ հանդիպման հիմնական նպատակը հարկային համակարգի բարեփոխումների հայեցակարգի վերաբերյալ արված առաջարկությունների քննարկումն է, որից հետո միայն այն պետք է ներկայացվի ԱՀ կառավարության հաստատմանը:
‹‹Խորապես համոզված ենք, որ ցանկացած բարեփոխում չի կարող հաջողությամբ իրագործվել առանց հասարակության կողմից ճիշտ ընկալման: Այդ նպատակով մենք փորձում ենք անել հնարավորը, որպեսզի հայեցակարգը մատչելի ներկայացվի հանրությանը: Հայեցակարգի հիմքում դրված է նաև հարկային օրենսգրքի մշակումը, որի համար ևս ունենալու ենք առարկայական քննարկումներ տարբեր շահագրգիռ անձանց հետ: Հարկային մարմնի կողմից գերակա խնդիր է հանդիսանում ունենալ այնպիսի համակարգ, որը էլ ավելի կնպաստի մեր երկրում գործարար միջավայրի բարելավմանը՝ դրա մեջ ներառելով բազմաթիվ ուղղություններ: Այսօր մենք ունենք օբյեկտիվ անհրաժեշտություն նորովի հարկային հարաբերություններ կազմակերպելու, քանի որ օրեցօր ունենում ենք նոր մարտահրավերներ››,- նշել է Ա. Հարությունյանը:
ԱՀ ֆինանսների նախարարության հարկային վարչարարության մեթոդաբանության և հարկ վճարողների իրազեկման բաժնի պետ Արմինե Մուսայելյանն էլ ասել է, որ հարկային համակարգի բարեփոխումների հայեցակարգը կազմված է հիմնականում չորս մասից:‹‹Առաջին մասում ներկայացվել է 2010-2017 թթ հարկային համակարգում իրականացված բարեփոխումները, այդ թվում դրանց թվային արդյունքները: Երկրորդ մասում ներկայացվել են առկա խնդիրները: Մեր կողմից կատարվել են օրենսդրական և վարչարարական դաշտի վերլուծություններ, վեր հանվել առկա բացերը: Երրորդ մասում նախանշված խնդիրների հիման վրա ներկայացվել են առաջիկա անելիքները, դրանց հասնելու հիմնական ուղղությունները՝ վերջում տալով ամփոփում: Մասնավորապես՝ 2010-2017 թթ. իրականացված օրենսդրական բարեփոխումների շարքում հարկ է ընդգծել փոքր շրջանառություն ունեցող սուբյեկտների համար արտոնագրային հարկով հարկման մեխանիզմի ներդրումը, եռամսյա ժամկետով հարկային արտոնությունների տրամադրումը նորաստեղծ հարկ վճարողներին, հանրապետությունում գերակա ճանաչված ոլորտների մասով հարկային արտոնությունների սահմանումը, ինչպիսիք են զբոսաշրջության, գյուղատնտեսության, բնակարանային շինարարության ոլորտները: Հաջորդ ուղղությունը վարչարարական դաշտում կատարված բարեփոխումներն են, որոնց մեջ մտնում է հարկ վճարողների սպասարկման, իրազեկման մակարդակների բարձրացումը և ռիսկերի կառավարման համակարգերի ներդրումը»,- մանրամասնել է Ա. Մուսայելյանը:
Նրա խոսքով՝ չնայած իրականացված բարեփոխումներին՝ ոլորտում դեռևս կան խնդիրներ: Գերակա ուղղություն է նաև հարկ վճարողների իրազեկումը, քանի որ կիրթ և օրինապահ հարկ վճարող ունենալը համակարգի ամենակարևոր խնդիրն է: Այդ ուղղությամբ աշխատանքները շարունակվելու են:
Հանդիպմանը ոլորտի ներկայացուցիչների հետ քննարկվել են մի շարք հարցեր:
