Հունգարիայի Պիտեր Պազմանի կաթոլիկ համալսարանի հայագիտական ամբիոնը երկրորդ տարին անընդմեջ հայտարարում է «Գալուստ Գյուլբենկյան» հիմնադրամի կրթաթոշակի մրցույթ:
Հունգարիայի կաթոլիկ համալսարանը հայտարարում է կրթաթոշակի մրցույթ
ՍՏԵՓԱՆԱԿԵՐՏ, հուլիսի 17, ԱՐՑԱԽՊՐԵՍ: Այս մասին «Արցախպրես»-ին տեղեկացրին Արցախի պետական համալսարանի ուսանողների հետ տարվող աշխատանքների, հանրային կապերի և լրատվության բաժնից` մանրամասնելով, որ մրցույթին կարող են մասնակցել նաև արցախյան բուհերի մագիստրանտներ, ովքեր ընտրվելու դեպքում հնարավորություն կունենան ուսում ստանալու Պիտեր Պազմանի կաթոլիկ համալսարանում` խորացնելով իրենց գիտելիքները հայագիտության ոլորտում:
Աղբյուրի հաղորդմամբ` կրթաթոշակը տրամադրվում է 10 ամիս` 2018թ. սեպտեմբերի 1-ից մինչև 2019թ. հունիսի 30-ը: Երկու կիսամյակի անգլերեն տարվող ուսուցման ընթացքում ուսանողները կաթոլիկ համալսարանում կծանոթանան ժամանակակից հայոց պատմությանը, մշակույթին եւ ինքնությանը` 18-րդ դարից մինչև մեր օրերը` մեծ ուշադրություն դարձնելով Արևմտյան Հայաստանի մշակույթին և գրականությանը:
Կրթաթոշակն ապահովում է «Հայագիտություն» մասնագիտության 2 կիսամյակի ուսման վարձը, ազատ մուտք Պիտեր Պազմանի կաթոլիկ համալսարանի գրադարան, ուսանողների հանրակացարանի վարձավճարը, կենսապահովման ծախսերը (5,000 եվրոյի չափով):
Նշենք, որ ցանկացողները հայտերը կարող են ուղարկել armenian.studies@btk.ppke.hu էլ. հասցեին մինչև ընթացիկ տարվա հուլիսի 20-ը:
Հավելենք, որ «Գալուստ Գյուլբենկյան» կրթաթոշակի մասին ավելի մանրամասն տեղեկանալու համար ցանկացողները կարող են այցելել https://ppke.hu/en/news/latest-news/scholarship-announcement կայք:
