Օրերս նկարահանվել է արցախցի երգիչ Նարեկ Վահանյանի «Ախճի, համութա» երգի տեսահոլովակը: Երգչի նպատակն է ներկայացնել արցախյան կոլորիտը կատակ-երգի ձևով:
Արցախյան բարբառով երգի տեսահոլովակը ջերմ ընդունելության է արժանացել. պատմում է երգի հեղինակը
ՍՏԵՓԱՆԱԿԵՐՏ, հունիսի 20, ԱՐՑԱԽՊՐԵՍ: Տեսահոլովակի ստեղծման մասին «Արցախպրես»-ի թղթակիցը զրուցել է Նարեկ Վահանյանի հետ:
Արցախցի երգիչը նշել է, որ իր երգերով փորձում է օրինակ հանդիսանալ ապագա սերնդի համար, որպեսզի նրանց համար ևս հոգեհարազատ լինեն արցախյան բարբառով կատարումները:
«Ցանկությունս մեծ էր, որ «Ախճի, համութա» տեսահոլովակը նկարահանվի Արցախում, սակայն, որոշ հանգամանքներով պայմանավորված, այն ամբողջությամբ նկարահանվել է Հայաստանում: Սցենարի, երաժշտության խոսքերի հեղինակը հայրս է` Վահրամ Գևորգյանը: Երգն ամբողջությամբ արցախյան բարբառով է: Չնայած կարճ ժամանակահատվածին` այն ջերմ ընդունելության է արժանացել մեր հասարակության կողմից: Այդ կերպ ես փորձում եմ մեր բարբառը հասանելի դարձնել ավելի լայն շրջանակների»,- ասել է Ն. Վահանյանը:
Մեր զրուցակիցը նշել է, որ երաժշտության հանդեպ իր հետաքրքրությունն առաջացել է դեռ մանկուց:
«Ստեփանակերտում հաճախել եմ երաժշտական ուսումնարան, իսկ Երևանում` ավարտել երգի պետական թատրոնի վոկալ բաժինը: Ընտանիքում ոչ մեկը պրոֆեսիոնալ երաժշտությամբ չի զբաղվել»,- ասել է Մարտակերտի շրջանի Ծմակահող համայնքից 23-ամյա Նարեկը և հավելել, որ մոտ 2 տարի առաջ էլ նկարահանվել էր իր «Հայոց արծիվներ» երգի տեսահոլովակը՝ նվիրված ապրիլյան պատերազմի զոհերի հիշատակին:
