ՍՏԵՓԱՆԱԿԵՐՏ, հուլիսի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ճամբարի հիմնական մասնակիցները Ծմակահողի և շրջակա բնակավայրերի դպրոցականներն են, ովքեր ուսումնական տարվա ընթացքում հաճախում են համայնքում գործող կիրակնօրյա դպրոցը:

ԱրՊՀ ֆիզիկայի ամբիոն պրոֆեսոր Կարեն Արամյանը, ով հանդիսանում է նաև ճամբարի հիմնական կազմակերպիչներից, իր ելույթում ասաց, որ այսօր նաև լրանում է խորհրդային տարիներին ականավոր ճարտարապետ, ֆիզիկոս և գյուտարար Անդրանիկ Իոսիֆյանի ծննդյան 113 ամյակը, ով ծննդով Ծմակահող գյուղից է:

«Անդրանկի Իոսիֆյանին որպես երախտապարտ լինելու դրսևորում, անհրաժեշտ է Արցախում զարգացնել բնագիտամաթեմատիկական ուղղությունը: Ճամբարականների այստեղ լինելու հիմնական նպատակներից մեկը հենց դա է: 

Կարևոր է, որ հետագայում որպես մասնագիտություն ընտրեք գիտության այնպիսի ուղղություն, որով ոչ միայն ձեզ համար կստեղծեք հուսալի ապագա, այլ նաև դրանով ձեր ներդրումն կունենաք երկրի գիտական ոլորտի զարգացման գործում»,- իր ելույթում դիմելով ճամբարականներին՝ ասաց Կ. Արամյանը:

ԱՀ կրթության, գիտության և սպորտի նախարար Նարինե Աղաբալյանը ողջունելով ներկաներին և շնորհավորելով ճամբարի մեկնարկի առթիվ, նշեց, որ այս ամենը կազմակեպվում է, որպեսզի նոր սերունդները ճանաչեն իրենց մեծերին և նաև հասկանան, որ այդ նույն գեների կրողն են:

«Արցախ աշխարհը տվել է զավակներ, ովքեր իրենց գործունեությամբ մեծ ներդրում են ունեցել ողջ մարդկության կյանքում: Այդպիսի մեծություն է նաև Անդրանիկ Իոսիֆյանը, ով իր անունը թողել է մեզ՝ որպես մեծ ժառանգություն»,- ասաց Ն. Աղաբալյանը:

Նախարարը դիմելով ճամբարականներին նշեց, որ յուրաքանչյուրը, եթե իր առջև դնի նպատակ և հետևողական աշխատանք տանի, ապա կարող է անցնել այդ նույն ճանապարհը՝ ճանաչելի դառնալով ոչ միայն հայրենքիում, այլև ողջ աշխարհում:

«Ձեզ այստեղ դասավանդելու են լավագույն մասնագետներ, և սա բացառիկ հնարավորություն է ձեզ համար: Ես մաղթում եմ հետաքրքիր ու հաճելի հանգիստ, բայց միևնույն ժամանակ ուզում եմ, որ առավելագույն գիտելիքներ ստանաք այստեղ, ինչը կնպաստի ձեր կարողոությունների զարգացմանը»,- նշեց Ն. Աղաբալյանը հավելելով, որ ճամբարականների համար կապահովեն բոլոր անհրաժեշտ պայմանները՝ հետաքրքիր և բովանդակալից առօրյա ունենալու համար:

Ճամբարի պետ Սևակ Հակոբյանը մեզ հետ զրույցում ասաց, որ պատանի բնագետների համար նախատեսված ճամբարը տևելու է տասներկու օր: «Այս տարի ունենք 70 մասնակից, որոնցից 10 հրավիրվել են Երևանի պետական համալսարանից և Երևանի Արտաշես Շահինյանի անվան ֆիզմաթ դպրոցից: Ճամբարը կազմակերպվում է Ծմակահողում գործող կիրակնօրյա դպրոցականների մասնակցությամբ, սակայն ամեն տարի փորձում ենք նաև հրավիրել մասնակիցներ Հայաստանից»,- նշեց նա:

Ս. Հակոբյանը հայտնեց, որ ճամբարականները ունենալու հագեցած առօրյա, քանի որ բացի դասապրոցեսներից կազմակերպվելու են նաև մարզական  և ինտելեկտուալ խաղեր, ինչպես նաև երկօրյա արշավ՝ դեպի մոտակա պատմամշակութային հուշարձաններ: