ՍՏԵՓԱՆԱԿԵՐՏ, հուլիսի 21, ԱՐՑԱԽՊՐԵՍ: Ուսանողական միջազգային ամառային ճամբարը կազմակերպվել էր  հուլիսի 6-21-ը, Ասկերանի շրջանի Պատարա գյուղի մերձակա տարածքում:

Հայաստանյան բազմաթիվ առաջատար բուհեր տարիներ շարունակ կազմակերպում են ամառային դպրոցներ, ճամբարներ: Արցախի պետական համալսարանը ևս առաջին անգամ հանդես է եկել նման նախաձեռնությամբ:

«Ուսուցումը ժամանակակից պայմաններում չի կարող սահմանափակվել միայն «ձևական» կրթությամբ,-ասում է ԱրՊՀ կազմակերպչական գծով պրոռեկտոր Վիտյա Յարամիշյանը և պարզաբանում,- այն պետք է լրացվի տարաբնույթ ոչ ֆորմալ կրթության ձևաչափերով, ինչպիսինն է այն կրթական ոչ ֆորմալ ծրագիրը, որը ԱրՊՀ-ում արդեն երկրորդ տարին է իրականացվում է, դրանցից մեկն էլ ամառային ճամբարներ կազմակերպելու պրակտիկան է: Մեր ուսանողների համար շատ կարևոր է շփվել ինչպես հայաստանյան հասակակիցների, այնպես էլ արտերկրի տարբեր համալսարաններում սովորող երիտասարդների հետ: Բազմաշերտություն ապահովելու համար մենք հրավիրել ենք  դասընթացավարներ Կալիֆորնիայի և Հայաստանի ամերիկյան համալսարաններից,  ովքեր ապահովել են հետաքրքիր ու արդյունավետ դասընթացներ»:

Այստեղ հանգստանում են շփման մեջ ակտիվ ուսանողներ ոչ միայն Արցախի և Հայաստանի ամենատարբեր բուհերից, այլև ԱՄՆ-ից, Ռուսաստանից, Հունգարիայից և այլ երկրներից:

«Այս նախաձեռնությունը կյանքի կոչելը ոչ միայն ուսանողների, այլև ԱրՊՀ ղեկավարության երազանքն էր,- ասում է ԱրՊՀ ՈՒՀՏԱ, ՀԿ և Լ բաժնի պետ Զարինե Սառաջյանը և շարունակում,- այս տարի այն հաջողվեց իրողություն դարձնել շնորհիվ բարերար Ֆիլիպ Էգգերի: Ուսանողական միջազգային ամառային ճամբարի մասնակիցները, արցախյան բնության անձեռակերտ գեղեցկությունը վայելելուց բացի, հնարավորություն ունեցան նաև մասնակցելու պաշտոնական հանդիպումների, հրատապ թեմաներով դասախոսությունների, թեժ բանավեճերի ու քննարկումների, ճանաչողական արշավների, էքսկուրսիաների, խարույկի շուրջ անցկացվող երեկոների, մարզական և մշակութային ծրագրերի, երիտասարդական, ժամանցային այլ միջոցառումների: Այն նաև հրաշալի հնարավորություն էր արտերկրից եկած ուսանողների համար Արցախը բացահայտելու և ճանաչելու»:

Ճամբարը կազմակերպվել է 3 փուլով` հուլիսի 6-10-ը, 11-15-ը և 16-21-ը, վրանային պայմաններում, որը կրկնապատկել է ուսանողների` բնության հետ ներդաշնակ լինելու զգացողությունը:

«Սկզբում մի քիչ անսովոր էր, որովհետև առաջին անգամ եմ շփվում արցախցիների հետ: Ես եկել եմ Հայաստանից ու իմ կապը Արցախի հետ շատ թույլ էր:  Առաջին օրերին արցախյան  բարբառը անհասկանալի էր, բայց հետո խաղերի միջոցով, ծանոթությունների շնորհիվ  աստիճանաբար սկսեցի հասկանալ այն, և շփումը ավելի հեշտացավ. հնարավորության դեպքում անպայման էլի կմասնակցեմ»,-«Արցախպրես»-ի թղթակցի հետ  կիսվում է ԵՊՀ-ի Իջևանի մասնաճյուղի ուսանող Շիրակ Գասպարյանը :

«Առաջին կուրսից սկսած` ինձ միշտ հրավիրում էին հանգստանալու հայաստանյան բուհերի կողմից կազմակերպվող ճամբարներում, և մտածում էի, որ մեր համալսարանն էլ կարող է կազմակերպել իր ճամբարը, որը հնարավորություն կտա ակտիվ ուսանողներին հանգստանալ  հենց մեր ճամբարում:  Տարիների ջանքերից հետո մենք` ուսանողական խորհրդի(ՈՒԽ) և ուսանողների հետ տարվող աշխատանքների (ՈՒՀՏԱ) բաժնի և համալսարանի ղեկավարության հետ միասին, իրականացրեցինք այս ծրագիրը,- ասում է ԱրՊՀ ՈՒԽ փոխնախագահ Վահե Գալոյանը:

Ճամբարի մասնակիցները ողջ ընթացքում  ակտիվորեն կազմակերպել են մշակութային և սպորտային միջոցառումներ` միտված տարբեր կողմերից բացահայտելու յուրաքանչյուր ուսանողի:

   ԱրՊՀ ղեկավարությունը հավաստիացնում է, որ ծրագիրը շարունակական բնույթ է կրելու: