ՍՏԵՓԱՆԱԿԵՐՏ, հուլիսի 23, ԱՐՑԱԽՊՐԵՍ: Արտադրությունն իր մեջ ներառում է Արցախի բարձրադիր գոտիներում ստացված մեղր, մեղրամոմերի լայն տեսականի (մի քանի նմուշ արդեն ներկայացված է խանութում), մեղրանյութերից պատրաստված օճառներ և այլն:

Ընկերությունը զբաղվում է արտադրական մեղվաբուծությամբ, և վաճառքը իրականացվում է բոլորին հասանելի գնով:

«Բազմազավակ ընտանիքներին, հաշմանդամության կարգ ունեցող քաղաքացիներին և թոշակառուներին ապրանքատեսականին վաճառվելու է 10 տոկոս զեղչով,- ասել է «ԱրցախՄեղր» ընկերության տնօրեն Էրիկ Մկրդումյանը և ավելացրել, որ իրենց ընկերությունը Արցախի մեղվաբույծների ասոցացիայի անդամ է:

ԱՀ գյուղատնտեսության նախարարի տեղակալ Տիգրան Առստամյանը «Արցախպրես»-ի հետ զրույցում նշեց, որ ասոցացիան գյուղնախարարության հետ համատեղ մշակել է ծրագիր, ըստ որի պայմանագրեր կկնքվեն մեղվաբուծությամբ զբաղվել ցանկացող պահեստազորային սպաների հետ, նրանց կտրամադրվեն մեղվաբուծության համար անհրաժեշտ պարագաներ ու մեղվաընտանիքներ: Հաջողելու դեպքում՝ կազմակերպությունը ինքը կգնի արտադրված մեղրը: Ծրագրի նպատակն է ապահովել պահեստազորային սպաների զբաղվածությանը և ինչ-որ չափով նպաստել այդ ընտանիքների ֆինանսական ապահովվածությանը:

Նշենք, որ Ստեփանակերտում բացված «Made in Artsakh» խանութում ներկայացված են Արցախում գործող 34 ընկերություններ, որոնք պարբերաբար թարմացնում են իրենց արտադրատեսակները:

Մեզ հետ զրույցում «Made in Artsakh»-ի տնօրենի տեղակալ Արտյոմ Առաքելյանը նշեց, որ առավել շատ իրացվում են գինիներ, թթի օղի, չրեղեն, վարդի և պոպոկի մուրաբաներ, ինչպես նաև «Արցախ» գրությամբ կամ Արցախին վերաբերող հուշանվերներ:

«Խանութի հաճախորդների գերակշիռ  մասը զբոսաշրջիկներն են: Մեր  կատարած աշխատանքը մենք  դիտարկում ենք ոչ միայն որպես  բիզնես  ծրագիր, այլ ավելի շատ  նպատակ  ունենք ցուցադրելու  արցախյան  բարիքները»,- ասել է Ա.  Առաքելյանը և  ընդգծել, որ խանութը  ընդունում է նաև  տաղանդավոր  արցախցիների կողմից  պատրաստված հուշանվերների  անհատական աշխատանքներ:

Հիշեցնենք, որ «Made in Artsakh» Արցախյան արտադրության ապրանքների մասնագիտացված խանութը Ստեփանակերտում գործում է ընթացիկ տարվա մարտի 1-ից: