ՍՏԵՓԱՆԱԿԵՐՏ, օգոստոսի 2, ԱՐՑԱԽՊՐԵՍ: Հարթաքանդակի   բացման    պատիվը   տրվել  է   Հենրիխ Պողոսյանի  քրոջը՝  Էլմիրա Պողոսյանին    և  արվեստագետ,  քանդակի  հեղինակ     Ալբերտ  Հարությունյանին:

«Արցախպրես»-ի  թղթակցի  հաղորդմամբ՝    միջոցառմանը  բացման   խոսքով  հանդես  է  եկել  ԱՀ   գրողների  միության  նախագահ  Վարդան  Հակոբյանը:

Նրա  խոսքով՝   հարթաքանդակը հարգանքի  տուրք  է      անվանի  քաղաքական  գործիչ, արցախյան   շարժման  մեծ  երեխտավոր   Հ. Պողոսյանի  վառ   հիշատակին:

Բնութագրելով   Հ.  Պողոսյանին՝    Վ. Հակոբյանն  առանձնացրել  է    նրա  սկզբունքայնությունը,   բարձր  ինտելեկտը  և    ժողովրդավարությունը:

«Հ.  Պողոսյանը  մեծ   ժողովրդականություն  և  սեր  էր    վայելում   արցախահայության   շրջանում. ժողովուրդն  անթաքույց  հպարտությամբ  ու  սիրով  էր  վերաբերվում  նրան: Պետական  մարմիններում  նա  ներկայացրել  է   արցախահայությանը: Հ.  Պողոսյանին  ճանաչողները   միշտ  էլ   բարի   հիշողություններով  և  անմնացորդ   սիրով  են    խոսում   նրա  մասին»,-մասնավորապես   ասել  է  Վ. Հակոբյանը:

 

Ելույթներով   հանդես  են  եկել   նաև   Հենրիխ  Պողոսյանի    գործընկերները  և   մտերիմները, ովքեր   բարձր  են  գնահատել   նրա     մարդկային  կերպարը՝  ամբողջացնելով  նրա  մարդկային  նկարագիրը: Հ. Պողոսյանը  արցախահայության  համար   բախտորոշ   ու   ծանր    ժամանակներում  ստանձնելով  ԼՂԻՄ  մարզկոմի  առաջին  քարտուղարի   պարտականությունները,  և     մտահոգված  լինելով  հայ  ժողովրդի    ճակատագրով՝    արել  է  իրենից  կախված  ամեն  ինչ.   հակազդելով Բաքվի հակահայկական  հարձակումներին    նա  միջազգային  հանրությանը հնարավորինս   կարողացել  է  հասու     դարձնել  Արցախի  հարցը:

Միջոցառռմանը  ներկա  էին  ԱՀ  Ազգային  Ժողովի  նախագահ  Աշոտ  Ղուլյանը, ԱՀ  նախագահի   աշխատակազմի  ղեկավար   Մարատ Մուսայելյանը,  Ստեփանակերտի  քաղաքապետ  Սուրեն   Գրիգորյանը, Հ. Պողոսյանի   հարազատները, ընկերները, մետրիմները,  ստեփանակերտցիներ և  այլք:

Նշենք, որ   Հենրիխ  Անդրեյի  Պողոսյանը ծնվել է 1931 թվականին Ստեփանակերտում: 1955 թվականին ավարտել է Մոսկվայի գյուղատնտեսական մեխանիզացիայի և էլեկտրաֆիկացիայի ինստիտուտը: 1955-1971 թվականներին ԼՂԻՄ-ում զբաղեցրել է տարբեր պատասխանատու պաշտոններ, 1971-1974 թվականներին եղել է Ստեփանակերտի քաղգործկոմի նախագահի առաջին տեղակալ, միաժամանակ՝ ագրոարդյունաբերության կոմիտեի նախագահ: 1988 թվականի փետրվարին ընտրվել է կոմկուսի ԼՂԻՄ մարզկոմի առաջին քարտուղար, 1989 թվականից՝ ԼՂ Ազգային խորհրդի անդամ: ԽՍՀՄ ԳԽ նախագահության ԼՂ-ին նվիրված 1988 թվականի հուլիսի 18-ի նիստում հիմնավորել է Ադրբեջանական ԽՍՀ կազմում ԼՂԻՄ-ի մնալու անհնարինությունը. իր ղեկավարման ընթացքում քայլեր է ձեռնարկել խնդրի խաղաղ կարգավորմանը: Մահացել  է  2000  թվականի  հունվարի  30-ին  Մոսկվայում: