«Ազատ հայրենիք» կուսակցությունը սեպտեմբերի 9-ին թիվ 10 և 11 ընտրատարածքներում անցկացվելիք Արցախի Հանրապետության Ազգային ժողովի մեծամասնական ընտրակարգով պատգամավորի լրացուցիչ ընտրություններին որևէ թեկնածուի չի սատարելու:
«Ազատ հայրենիք» կուսակցությունը թիվ 10 և 11 ընտրատարածքներում անցկացվելիք ընտրություններին որևէ թեկնածուի չի սատարելու. Արթուր Թովմասյան
ՍՏԵՓԱՆԱԿԵՐՏ, օգոստոսի 8, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «Ազատ հայրենիք» կուսակցության ԱԺ «Հայրենիք» խմբակցության ղեկավար Արթուր Թովմասյանը:
Նրա խոսքով՝ նման որոշում է կայացվել, քանի որ կուսակցության համար պատգամավորական մանդատ ստանալը ինքնանպատակ չէ: «Խնդիրը նաև բարոյական կողմ ունի: 2015թ.-ին անցկացված խորհրդարանական ընտրություններն նշված ընտրատարածքներում «Ազատ հայրենիք» կուսակցությունը մեծամասնական ընտրակարգով թեկնածուներ չէր առաջադրել, և, հարգելով նաև գործընկեր կուսակցությունների հետ մեր փոխհարաբերությունները, մենք նման որոշում ենք կայացրել: Թեկուզ մենք որևէ թեկնածուի չենք սատարելու, բայց ակտիվ մասնակցություն ենք ունենալու, որպեսզի ընտրություններն անցնեն ազատ, արդար պայմաններում և համապատասխանեն ԱՀ Սահմանադրության և «Ընտրական օրենսգրքի» պահանջներին»,- ասել է Ա. Թովմասյանը և ավելացրել, որ նշված ընտրատարածքներում «Ազատ հայրենիք» կուսակցության անդամները ազատ են իրենց ընտրության հարցում:
Նշենք, որ թիվ 10 և 11 ընտրատարածքներում ԱՀ Ազգային ժողովի մեծամասնական ընտրակարգով պատգամավորի լրացուցիչ ընտրություններին առաջադրվել են համապատասխանաբար 10 և 11 թեկնածուներ: Նշված երկու ընտրատարածքներում կուսակցական առաջադրմամբ հանդես են գալիս երկու թեկնածուներ՝ թիվ 10-ում Հայ հեղափոխակաան դաշնակցության կողմից, իսկ թիվ 11-ում՝ Լիբերալ դեմոկրատական կուսակցությունից: Մյուս բոլոր թեկնածուներն ընտրություններին մասնակցում են ինքնաառաջադրմամբ: