Հրդեհներն այս տարի էական վնաս են հասցրել, ոչ միայն ցանքատարածքներին, այլ նաև գյուղատնտեսական նշանակության այլ տարածքների ինչպիսիք են այգիները, արոտավայրերը:
Հրդեհից պատճառված վնասի դեպքում հողօգտագործողներին պետական աջակցություն չի տրվի
ՍՏԵՓԱՆԱԿԵՐՏ, օգոստոսի 10, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր լրագրողների հետ հանդիպմանը ասել է ԱՀ գյուղատնտեսության նախարար Ժիրայր Միրզոյանը:
Նա նշել է, որ ի տարբերություն կարկուտների և ուժեղ քամիների հետևանքով հասցված վնասների, հրդեհների դեպքում Կառավարության կողմից փոխհատուցման մասին խոսք լինել չի կարող: «Հրդեհների պատճառած վնասների մասով հողօգտագործողները բարձրացրել են փոխհատուցման վերաբերյալ տարբեր հարցեր: Հրդեհները մարդկային գործոնի հետևանքով հասցված արհեստական աղետ է, որոնք, իհարկե, փոխհատուցման ենթակա են, բայց այն անձնաց կողմից, ովքեր առաջացրել են այդ դրանք և պատասխանատվություն են կրում նաև հետևանքների համար, մանավանդ, որ այգեգործական տարածքներին, արոտավայրերին և անտառներին հասցված վնասը մի քանի տարվա ընթացքում չի վերականգնվում»,- նշել է գյուղնախարարը, հավելելով նաև, որ օրեսնդրությամբ սահմանված կարգով այդ անձինք ենթակա են պատասխանատվության և գյուղատնտեսության նախարարությունը նմանատիպ հարցեր լուծելու համար ընդամենը հանդիսանում է ընդհանուր համակարգի օղակներից մեկը:
Ժ. Միրզոյանը ընդգծեց, որ հացահատիկի բերքահավաքի ակտիվ փուլի ընթացքում, շնորհիվ Արտակարգ իրավիճակների պետական ծառայության և շրջանների վարչակազմերի հետ համակարգված փոխգործակցության, հրդեհները հնարավորինս մեկուսացվել են և բերքահավաքը ավարտվել է նվազագույն կորուստներով. վնասվել է ընդամենը 69 հեկտար աշնանացան և 8 հա գարնանացան ցանքատարածքներ:
Գյուղնախարարի խոսքով, սակայն գրանցվել են նաև այլ վնասներ՝ 28 հա պտղատու այգիներ և 40 հազար հա արոտավայրեր ու բուսածածկ տարածքներ: «Մեր ուսումնասիրությունները ցույց են տվել, որ հրդեհված բոլոր այգիները եղել են չմշակված կամ թերի մշակված, որովհետև ճիշտ ժամկետում և ագրոտեխնիկական բոլոր պահանջներին համապատասխան մշակման դեպքում նույնիսկ մեր ամենամեծ ցանկության դեպքում այգիները հնարավոր չէ հրդեհել»,- ընդգծեց նախարարը:
