Արցախի և Հայաստանի Հանրապետությունների կրթության, գիտության և սպորտի (ԿԳՍ) նախարարությունների համատեղ նախաձեռնությամբ, Ասկերանի շրջանի Պատարա գյուղում, օգոստոսի 10-19-ը կազմակերպվել է ճամբար:
Պատարայի ճամբարը հյուրընկալել է Արցախի ու Հայաստանի դպրոցականներին
ՍՏԵՓԱՆԱԿԵՐՏ, օգոստոսի 13, ԱՐՑԱԽՊՐԵՍ: Ճամբարին մասնակցում են Արցախի և Հայաստանի հանրակրթական դպրոցների 11-12-րդ դասարանների շուրջ 80 աշակերտ:
«Արցախպրես»-ի թղթակցի հաղորդմամբ՝ ԱՀ ԿԳՍ նախարար Նարինե Աղաբալյանն ասել է, որ ճամբարի ընթացքում երեխաները հնարավորություն կունենան ծանոթանալու ոչ միայն Արցախի բնության հրաշալիքներին, այլև գյուղի տարածքում գտնվող բազմաթիվ պատմամշակութային հուշարձանների։
«Հենց Պատարա գյուղի անտառներում են 30 տարի առաջ կազմավորվել մեր ինքնապաշտպանական առաջին ջոկատները, որոնք այնուհետև ՊԲ ստորաբաժանումներ են դարձել և ապահովել մեր հաղթանակը՝ մեզ պարտադրված պատերազմում։ Այդ պայքարի իմաստը, նպատակը մեկ միասնական հայրենիք ունենալն էր։ Ճիշտ է, այդ պայքարի ընթացքում երկու հայկական հանրապետություն է հռչակվել, բայց մենք միասին ենք, և մեր բոլոր ջանքերն ուղղված են լինելու այդ մեկ միասնական հայրենիք ունենալու գաղափարի իրագործմանը։ Այս ճամբարի կազմակերպումը հենց դրա դրսևորումներից մեկն է»,-ասել է Ն. Աղաբալյանը։
ՀՀ ԿԳ նախարար Արայիկ Հարությունյանն էլ վստահեցրել է, որ նման համատեղ ծրագրերը շարունակական են լինելու:
Նա ևս կարևորել է նման միջոցառումների անցկացումը և մասնավորապես ասել․ «Ճանաչելով միմյանց՝ մենք ավելի ուժեղ ենք դարձնում մեր հայրենիքը։ Ճանաչելով մեր բնությունը՝ ավելի են մեծանում այն պաշտպանելու և պահպանելու հայրենասիրական մղումները»։
Ճամբարականների համար ըստ ծրագրի նախատեսված է կազմակերպել մարզամշակութային միջոցառումներ, այցելություններ՝ պատմամշակութային վայրեր, ինչպես նաև հանդիպումներ ու դասախոսություններ։
Նշենք, որ ճամբարի փակման հանդիսավոր արարողությունը տեղի կունենա օգոստոսի 18-ին։
