Նոր ուսումնական տարվան ընդառաջ «Արցախպրես»-ի թղթակիցը Ստեփանակերտի վաճառակետերում փորձել է պարզել, թե մեկ աշակերտի հաշվով որքա՞ն գումար է անհրաժեշտ գրենական պիտույքներ, դպրոցական հագուստ և այլ անհրաժեշտ պարագաներ գնելու համար:
Որքա՞ն գումար է անհրաժեշտ դպրոցական պարագաներ գնելու համար
ՍՏԵՓԱՆԱԿԵՐՏ, օգոստոսի 16, ԱՐՑԱԽՊՐԵՍ: Ստեփանակերտում գրենական պիտույքների վաճառք իրականացնող անհատ ձեռներեց Հասմիկ Մինասյանին պատկանող «Կոմպաս» խանութի վաճառողուհի Կամելա Աբրահամյանը մեզ հետ զրույցում տեղեկացրել է, որ տետրերի գները տատանվում են 28-350 դրամի սահմաններում, գրիչներինը՝ 50-250-ի, իսկ դպրոցական պայուսակներինը՝ 3700-12.500-ի:
«Եթե համեմատենք նախորդ տարվա հետ, պիտի ասեմ, որ և տետրերի և դպրոցական պայուսակների գները նվազել են, իսկ մնացած դպրոցական պարագաներինը, եթե չեն էլ նվազել, ապա թանկացումներ էլ չկան»,- նշել է Կ. Աբրահամյանը:
Դպրոցահասակ երեխաներ ունեցող ծնողների հետ ունեցած մեր զրույցից էլ պարզել ենք, որ յուրաքանչյուր երեխայի գրենական պիտույքներ և հագուստ գնելու համար անհրաժեշտ է 40-80 հազար դրամ: Ծնողների հավաստմամբ՝ այդ գումարը ոչ բոլոր ընտանիքներին է հասու:
ԱՀ կրթության, գիտության և սպորտի փոխնախարար Միքայել Համբարձումյանն էլ ասել է, որ ինչպես նախորդ տարիներին, այս տարի ևս առաջին դասարան հաճախող երեխաներին պետական աջակցություն կցուցաբերվի: Նա նշել է, որ առաջին դասարան հաճախող յուրաքանչյուր երեխայի կտրամադրվի 20 հազարական դրամ գումար:
Նշենք նաև, որ Ստեփանակերտում գրենական պիտույքների վաճառք իրականացնող որոշ անհատ ձեռներեցներ խուսափել են մեր հարցադրումներից:
