Արցախում բանջարանոցային մշակաբույսերի արտադրությանը զարկ տալու նպատակով գյուղնախարարության կողմից 2018 թվականին մշակվել և գործարկվել է «Արցախի Հանրապետությունում բուսաբուծության համալիր զարգացման ծրագիրը»:
Ընթացիկ տարում բուսաբուծության համալիր զարգացման ծրագրից օգտվել է 187 հողօգտագործող
ՍՏԵՓԱՆԱԿԵՐՏ, օգոստոսի 21 ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ գյուղատնտեսության նախարարության բուսաբուծության և բույսերի պաշտպանության բաժնի պետ Արամ Բադալյանն ասել է, որ ծրագրի շրջանակում նախորդ տարիներին աջակցության ենթակա պոմիդորի, բադրիջանի, պղպեղի, սոխի ու սխտորի ցանկը համալրվել է ևս 4 տեսակի բանջարեղենով՝ վարունգ, կաղամբ, գազար, բազուկ:
Նրա խոսքով՝ որպես աջակցություն, թվարկված բանջարեղենի տեսականու յուրաքանչյուր 1 հա-ի մշակության համար նախատեսվել է 200 հազար դրամ գումարի տրամադրում՝ անհատույց: Առաջին անգամ աջակցություն է տրամադրվել նաև կարտոֆիլի մշակության համար՝ 150 հազար դրամ յուրաքանչյուր 1 հա-ի մշակության դիմաց: Ի դեպ, որ աջակցությունը տրամադրվում է սկսած 0,5 հա մակերեսի մշակության համար:
«Ծրագրից օգտվելու համար ընթացիկ տարում 559 հա բանջարեղենի և 58 հա կարտոֆիլի մշակության համար հայտեր էին ներկայացվել Ասկերանի, Հադրութի, Մարտակերտի, Մարտունու և Քաշաթաղի շրջանների թվով 345 հողօգտագործողներ: ԱՀ ԳՆ աշխատակազմի բուսաբուծության և բույսերի պաշտպանության բաժնի ներկայացուցիչների կողմից՝ ցանքատարածքների ուսումնասիրությունից ու ստուգումներից հետո միայն 187 հայտ է ստացել դրական եզրակացություն՝ 326 հա բանջարեղենի և 44 հա կարտոֆիլի մշակության համար»,-տեղեկացրել է Ա. Բադալյանը:
Նա նշել է, որ ընդհանուր առմամբ 2018 թվականին բանջարեղենի ու կարտոֆիլի մշակության դիմաց նախատեսված աջակցության գումարը կազմել է 71 մլն 802 հազար ՀՀ դրամ:
