Օգոստոսի 24-ից Ստեփանակերտի պատկերասրահում բացվել է աշխարհում լայն ճանաչում գտած լոնդոնաբնակ գեղանկարիչ Արթուր Օշականցու կտավների ցուցահանդեսը. այն նվիրված է Արցախի Հանրապետության անկախության 27-րդ տարեդարձին:
Ստեփանակերտի պատկերասրահում ցուցադրության է դրված Արթուր Օշականցու կտավները
ՍՏԵՓԱՆԱԿԵՐՏ, օգոստոսի 31, ԱՐՑԱԽՊՐԵՍ: «Արցախպրես»-ի թղթակցի հետ զրույցում Ստեփանակերտի պատկերասրահի տնօրեն Ելենա Դադայանն ասել է, որ Արթուր Օշականցու գործերում նկատելի են տարբեր ուղղությունների՝ ռեալիզմ, սյուրռեալիզմ, աբստրակցիոնիզմ և այլ ոճեր։
Նրա խոսքով՝ Օշականցու գործերն իրենց պատվավոր տեղն ունեն Հայաստանի, Ֆրանսիայի, Շվեյցարիայի, Ռուսաստանի, Գերմանիայի, Լեհաստանի, Անգլիայի, ԱՄՆ-ի մի շարք պատկերասրահներում ու թանգարաններում:
«Իր ինքնատիպ արվեստով Օշականցին վարպետորեն խաչաձևում է համաշխարհային գեղանկարչության ձեռքբերումները: Աշխարհի տարբեր երկրներում ավելի քան հարյուր ցուցահանդեսներով ներկայացած գեղանկարիչը պատիվ է համարել Արցախում իր կտավների ցուցադրությունը»,-ասել է Ե. Դադայանը և հավելել, որ ցուցահանդեսը բաց կլինի մինչև սեպտեմբերի 23-ը:
Տնօրենն ավելացրել է, որ լոնդոնաբնակ հայ նկարչին ոգեշնչում ու ոգևորում է այն հանգամանքը, որ, ապրելով արտասահմանում, նա մշտապես ներկայանում ու ճանաչվում է որպես հայ արվեստագետ:
Նշենք, որ գեղանկարիչ Արթուր Օշականցին 1992 թվականից Գոթենհամ թանգարանի հրավերով հաստատվել է Լոնդոնում։ 2003 թվականին Նյու Յորքի «Մետրոպոլիտեն» թանգարանը անվանի հայ գեղանկարչին արվեստի պատմության մեջ հռչակել է, որպես աբստրակտ նատուրալիզմի հիմնադիր։
