Կոխ մարզաձևից Ստեփանակերտում անց է կացվել ՀՀ երիտասարդների բաց առաջնություն
ԱՀ կրթության, գիտության և սպորտի և ՀՀ սպորտի և երիտասարդության հարցերի նախարարությունների, ՀՀ հայկական կոխ-ըմբշամարտի ֆեդերացիայի համատեղ նախաձեռնությամբ Ստեփանակերտի N6 հիմնական դպրոցի մարզադահլիճում այսօր առաջին անգամ կոխ մարզաձևից անց է կացվել ՀՀ երիտասարդների բաց առաջնություն՝ նվիրված ԱՀ անկախության 27-ամյակին:
Կոխ մարզաձևից Ստեփանակերտում անց է կացվել ՀՀ երիտասարդների բաց առաջնություն
ՍՏԵՓԱՆԱԿԵՐՏ,սեպտեմբերի 1,ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ առաջնությանն ԱՀ-ից և ՀՀ-ից մասնակցում է շուրջ 50 մարզիկ:
Բացման խոսքով միջոցառմանը հանդես է եկել ԱՀ կրթության, գիտության և սպորտի նախարար Նարինե Աղաբալյանը:
Նա ասել է, որ կոխը հայկական մարզաձև է, որը դարերի խորքից եկած պատմություն ունի:
Ն. Աղաբալյանը կարևորել է նման սպորտային միջոցառումների իրականացումը և նշել, որ այն նպաստում է հայկական ազգային մարզական ավանդույթների պահպանմանը, ֆիզիկական դաստիարակության ազգային համակարգի առանձնահատկությունների ուսումնասիրմանը, հայրենասիրական դաստիարակության կարևորմանը, ազգապահպանմանը, երիտասարդ սերունդների ճիշտ արժեհամակարգի ձևավորմանը:
Հայկական կոխ-ըմբշամարտի ֆեդերացիայի նախագահ, հունա-հռոմեական ըմբշամարտի աշխարհի չեմպիոն Վաղինակ Գալուստյանն ասել է, որ հայ ժողովրդի պատմության մեջ ազգային մարզաձևերը, ֆիզիկական վարժությունները և ժողովրդական խաղերը ձևավորվել են դարեր առաջ: Հին Հայաստանում էլ տարածված են եղել մենամարտի մի շարք տեսակներ, որոնցից ամենահինն ըմբշամարտն է, իսկ կոխն էլ ըմբշամարտի ճյուղերից է:
Ըստ Վ. Գալուստյանի՝ նման մրցույթները հնարավորություն են տալիս պահպանել ազգային մարզաձևերը: Այն խթանում է նաև այս մարզաձևի մասսայականացմանն ու զարգացմանը, ուրեմն այն պետք է իրականություն դառնա համապատասխան նախարարությունների, ֆեդերացիաների, սպորտի բնագավառում աշխատողների շնորհիվ:
Միջոցառմանը ԱՀ ԿԳՍ նախարարը և ԱՀ ազգային անվտանգության ծառայության տնօրեն, ՀՀ սպորտի վարպետ Սամվել Շահրամանյանը հաղթողներին պարգևատրել են մեդալներով, պատվոգրերով և դրամական պարգևներով:
Նշենք, որ միջոցառմանը հանդես են եկել «Տնջրե» երգի-պարի խումբը և Ստեփանակերտի մշակույթի տան դհոլահարների համույթը: