Շուշիի կերպարվեստի պետական թանգարանում կայացել է «Վարանդա» մանկական, պատանեկան և երիտասարդական պետական երգչախմբի մենահամերգը` նվիրված արցախյան շարժման 30, Հայաստանի առաջին Հանրապետության 100, Երևանի հիմնադրման 2800 և համազգային հայ կրթական և մշակութային միության 90-ամյակներին:
Շուշիում կայացել է «Վարանդա» երգչախմբի մենահամերգը (տեսանյութ)
ՍՏԵՓԱՆԱԿԵՐՏ, սեպտեմբերի 5, ԱՐՑԱԽՊՐԵՍ: Համերգին հնչել են դասական, ժողովրդական, ժամանակակից և արտասահմանյան խմբերգեր:
«Արցախպրես»-ի թղթակցի հետ զրույցում «Վարանդա» երգչախմբի գեղարվեստական ղեկավար և խմբավար, Արցախի արվեստի վաստակավոր գործիչ Զաքար Քեշիշյանն ասել է, որ Շուշիում խումբն ինքը ստեղծել է 1992 թվականին:Այն ժամանակ դեռևս ինքը եղել է Երևանի Կոմիտասի անվան պետական կոնսերվատորիայի խմբավարի, շվիահարի և դուդուկահարի բաժինների ուսանող: Շուշիի Արամ Մանուկյանի անվան վարժարանում Զ. Քեշիշյանի հիմնադրած երգչախումբը նպատակ ուներ պատերազմի արհավիրքն ապրող շուշեցի մանուկների ու պատանիների կյանքը փոխել, որպեսզի նրանց դեմքերին ճառագի ժպիտը:Երգչախմբի ղեկավարն ասել է, որ 26 տարի առաջ Արցախին սիրահարված արվեստագետը որոշեց իր կյանքը նվիրաբերել ԱՀ մշակույթի զարգացմանը: Տարիների հեռվից դիտարկելով անցյալը՝ իրեն թվում է թե անցյալը մի ակնթարթ է, լի է լույսով, սիրով, երգով, պատերազմով և հաղթանակի բերկրանքի վայելումով:
«Այդ աշխատանքները կարողացա կատարել շնորհիվ ավելի քան 700 հին ու նոր սաներիս օգնությամբ. նրանց հետ իմ ստեղծագործական ճանապարհը շարունակվելու է այնքան ժամանակ, որքան կզգացվի իմ կարիքը: Գործունեության 26 տարիների ընթացքում երգչախումբն ավելի քան 200 համերգներով հանդես է եկել Արցախի տարբեր շրջաններում, զորամասերում, դպրոցներում, ինչպես նաև Հայաստանում և Սփյուռքում: Երգչախմբի երգացանկը հարստացել է հայ ականավոր բանաստեղծների և երգահանների 106 նոր երգերով: «Վարանդա» երգչախմբի մասին նկարահանվել է 2 վավերագրական ֆիլմ»,-ավելացրել է Զ. Քեշիշյանը:Մեր զրուցակցի խոսքով՝ իր՝ արվեստագետի մեծ ցանկությունն է, որ հայ ժողովրդի հետագա ճանապարհը լինի էլ ավելի զգոն, միասնական, խելամիտ, նպատակասլաց:
Միջոցառմանն ԱՀ նախագահ Բակո Սահակյանի հրամանագրով՝ ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը, ԱՀ մշակույթի վաստակավոր գործչի պատվավոր կոչում է շնորհել «Վարանդա» երգչախմբի շատ երգերի խոսքերի հեղինակ, ՀՀ մշակույթի վաստակավոր գործիչ, բանաստեղծ Յուրի Սահակյանին. այն ստացել է Յու. Սահակյանի որդին:
Համերգին ներկա էին երաժիշտներ, բանաստեղծներ, մշակույթի գործիչներ, արվեստասեր հասարակություն:
