ՍՏԵՓԱՆԱԿԵՐՏ, սեպտեմբերի 7, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել  է  «Արցախի սոցիալական ծրագրերի հիմնադրամ»-ի տնօրեն Մարատ  Հասրաթյանը:

Նրա խոսքով` գյուղական կամ քաղաքային՝ բացառությամբ Ստեփանակերտ և Շուշի քաղաքների, բնակավայրերում մշտապես բնակվող երիտասարդ ընտանիքներին բնակելի տներ կառուցելու նպատակով 3 մլն անհատույց պետական ֆինանսական աջակցություն տրամադրելու ծրագիրը շարունակելու է գործել նաև 2019 թվականին:

«Այդ շրջանակներում, մինչև ընթացիկ տարվա վերջ կբավարարվեն 2016-17 թվականններին պետական աջակցություն ստանալու համար ներկայացված 83 հայտատերերը: Այս տարվա արդեն ընդունված ևս 28-ը, ինչպես  նաև  մինչև տարեվերջ  էլ  ընդունվելիք հայտերը կբավարարվեն 2019 թվականի ընթացքում»,-ասել  է Մ.  Հասրաթյանը:

Խոսելով զոհված ազատամարտիկների զավակների, երկրորդ և երրորդ կարգի զինվորական հաշմանդամության կարգ ունեցողների, փախստականների, միածնող, ինչպես նաև 4 և ավելի անչափահաս երեխաներ ունեցող բազմազավակ ընտանիքներին հիփոթեքային վարկերի կանխավճարների և տոկոսների լրիվ սուբսիդավորման պետական աջակցության ծրագրից՝ Մ. Հասրաթյանն ասել է, որ ընթացիկ տարվա հունիսի 6-ից ժամանակավորապես դադարեցվել է միայն բնակարան գնելու համար հիպոթեքային վարկի սուբսիդավորումը:

 

«Բնակարանի վերանորոգման, կառուցման համար հիպոթեքային վարկերի սուբսիդավորմանը նպատակաուղղված պետական ֆինանսական աջակցությունն արդեն սկսվել է. հույս ունենք, որ 2019 թվականին կշարունակվի նաև բնակարանների գնման համար նախատեսվող աջակցությունը  ևս:

 

Մ. Հասրաթյանը, ընդհանուր առմամբ,  հաջողված է համարում հիմնադրամի գործունեությունը: Նրա տեղեկացմամբ` 2016 թվականից մինչև այժմ հիմնադրամը սուբսիդավորել է 237 ընտանիքների բնակարանի գնման, ինչպես նաև 165-ի վերանորոգման ու  23-ի կառուցման հիփոթեքային վարկերի տոկոսագումարները:

 

«Արցախի սոցիալական ծրագրերի հիմնադրամ»-ի տնօրենը ավելացրել է նաև, որ ԱՀ կառավարության որոշմամբ` զինվորական հաշմանդամություն ունեցող առաջին և երկրորդ խմբերի հաշմանդամներին օգտագործված էլեկտրաէներգիայի և բնական գազի դիմաց պետական-ֆինանսական աջակցության ծրագիրը ևս  առայժմ ուժի մեջ է: