ԱՀ կառավարության որոշմամբ՝ հանրապետությունում իրականացվում է 12 վարակիչ հիվանդությունների դեմ կանխարգելիչ պատվաստումներ:
Հորդորում ենք ժամանակին և պարտադիր կատարել պատվաստումներ. ԱՀ առողջապահության ոլորտի պատասխանատու
ՍՏԵՓԱՆԱԿԵՐՏ, սեպտեմբերի 12, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ առողջապահության նախարարության պետական հիգիենիկ և հակահամաճարակային տեսչության գլխավոր մասնագետ, համաճարակաբան Կարինե Բալայանը՝ նշելով, որ այդ պատվաստումների միջոցով կանխարգելվում են մի շարք հիվանդություններ (կարմրուկ, կարմրախտը, խոզուկ, պոլիոմիելիտ, հեպատիտ Բ, կապույտ հազ, դիֆթերիա և այլն):
«Մանկական պոլիկլինիկաներում պատվաստումների իրականացումը փոքրերի շրջանում կատարվում է ժամանակին, այսինքն՝ ըստ պատվաստումների օրացույցի, իսկ մեծահասականերն այնքան էլ հետևողական չեն այս հարցում: Մեզ մոտ եղած պատվաստանյութերը որակյալ են. դրանք անվճար են տրամադրվում քաղաքացիներին: Ըստ կարգի՝ Ստեփանակերտի բնակիչները պետք է պատվաստվեն մայրաքաղաքի պոլիկլինիկական բաժանմունքում, իսկ շրջանների բնակիչները՝ իրենց շրջանային հիվանդանոցներում: Շնորհիվ իրականացված կանխարգելիչ պլանային պատվաստումների, ապահովվում է բնակչության սանիտարահակահամաճարակային անվտանգությունը»,-տեղեկացրել է Կ. Բալայանը:
Նա ավելացրել է, որ, ըստ պատվաստումների օրացույցի, այժմ հանրապետության ամբուլատոր պոլիկլինիկական բաժանմունքներում իրականացվում են 26, 36, 46, 56 տարեկան անձանց պատվաստումներ՝ դիֆթերիա և փայտացում հիվանդությունների դեմ:
Ոլորտի պատասխանատուն նշել է նաև, որ ԱՀ առողջապահությունը հորդորում է, բոլոր մեծահասակներին և երեխաների ծնողներին, որպեսզի ժամանակին և պարտադիր կատարեն իրենց համապատասխան պատվաստումները:
