Արցախի պետական համալսարանն այսօր հյուրընկալել է Լայպցիգի համալսարանի Լայբնիցի ինստիտուտի Արևելյան Եվրոպայի պատմության և մշակույթի ֆակուլտետի մի խումբ ուսանողների և ասպիրանտների՝ գլխավորությամբ ինստիտուտի տնօրենի տեղակալ, պրոֆեսոր Շտեֆան Տրյոբսթի:
Լայպցիգի համալսարանի պատվիրակությունն այցելել է Արցախի մայր բուհ
ՍՏԵՓԱՆԱԿԵՐՏ, սեպտեմբերի 13, ԱՐՑԱԽՊՐԵՍ: Հանդիպման թեման եղել է «Սառը կոնֆլիկտները Հարավային Կովկասում»:
«Արցախպրես»-ի թղթակցի հաղորդմամբ՝ հանդիպմանը բացման խոսքով հանդես է եկել ԱրՊՀ ռեկտորի պաշտոնակատար Մանուշ Մինասյանը: Նա շնորհակալություն է հայտնել Լայպցիգի համալսարանի պատվիրակության անդամներին, ովքեր սեպտեմբերի 12-14-ը, գտնվելով Արցախում, ցանկություն են հայտնել լինել նաև մայր բուհում:
Մ. Մինասյանը հյուրերին է ներկայացրել Արցախի պետական համալսարանի անցած ուղին, ձեռքբերումները և անելիքները:
«Մենք միշտ էլ փորձել ենք ընդգրկվել Եվրոպական կրթական համակարգում: ԱրՊՀ-ն ունի խնդիրներ, որոնք պայմանավորված են երկրի չճանաչվածությամբ: Ի հեճուկս Ադրբեջանի և նրա վարած քաղաքականության՝ այսօր մեր համալսարանն ունի 35-ից ավելի այլ բուհերի հետ կնքած պայմանագրեր, այդ թվում՝ Եվրոպական, Ռուսաստանի Դաշնության և ՀՀ առաջատար բուհերի հետ»,-ավելացրել է Մ. Մինասյանը:
Շտեֆան Տրյոբսթն էլ ասել է, որ սա իրենց առաջին այցն է Հարավային Կովկաս, որը բազմաթիվ սառեցված հակամարտությունների տարածաշրջան է:
«Մենք մեր ուղևորությունները սկսել ենք վրաց-աբխազական սահմանից, այնուհետև եղել ենք Հայաստանում, որտեղ հանդիպում ենք ունեցել արտաքին գործերի և պաշտպանության նախարարների հետ: Արցախում էլ հանդիպել ենք ԱՀ արտաքին գործերի նախարարի հետ:
Արցախ այցելած մեր պատվիրակության անդամների մեծ մասը հայեր, լեհեր և հունգարացիներ են: Մենք այստեղ ենք ավելի մոտիկից ծանոթանալու համար Արցախի ձեռքբերումներին ու խնդիրներին»,-հավելել է Շտեֆան Տրյոբսթը:
Խոսելով Արցախի չճանաչված լինելու մասին՝ Շտեֆան Տրյոբսթն ասել է, որ իրենց համալսարանը չի կարևորում թե ինչ կարգավիճակում է, իրենց այցելած երկիրը:
Լայպցիգի համալսարանի գլոբալ և տարածաշրջանային ուսումնասիրությունների դպրոցի համակարգող Մարտինա Քայլբախը նշել է, որ Արցախի մասին իրենք միայն գիտեն այն, որ այստեղ ոչ պատերազմ, ոչ խաղաղություն կարգավիճակ է:
Իրենց այցի շրջանակներում Մարտինա Քայլբախը ակնկալում է ավելի մոտիկից ծանոթանալ Արցախի հիմնախնդրին, շփվել արցախցիների հետ և ծանոթանալ այլ ոլորտների խնդիրներին:
Իսկ ԱՀ մարդու իրավունքների պաշտպանի աշխատակազմի դեպարտամենտի ղեկավար Արտակ Բեգլարյանն էլ ասել է, որ արտերկրից ժամանածներն երբեմն այն նախնական կարծիքին են լինում, թե Արցախը միայն հակամարտության գոտի է: Գալով Արցախ՝ նրանք տեսնում են, որ երկրի ներքին կյանքը խաղաղ է:
«Եվրոպական երկրների համեմատ Արցախի ներքին անվտանգության աստիճանն ավելի բարձր է: Դժբախտաբար, մենք Ադրբեջանի հետ ունենք հակամարտություն, որը տարածաշրջանում ընդհանուր լարվածության գլխավոր պատճառն է: Ադրբեջանը կանոնավոր կերպով պատերազմ սկսելու սպառնալիքներ ու հայատյաց հայտարարություններ է հնչեցնում: Չնայած այդ խնդիրներին ու դժվարություններին՝ մենք կերտել ու շարունակում ենք կերտել մեր պետականությունը: Պետականության ամրապնդման հիմքերից է մարդու իրավունքների պաշտպանությունը, որի վրա զգալի ուշադրություն ենք դարձնում, և փորձում ենք անընդհատ բարելավել Արցախում մարդու իրավունքների միջավայրը: Այդ նպատակին ուղղված քայլերից էր Մարդու իրավունքների պաշտպանի ինստիտուտի հիմնումը 2008 թվականին: Բացի ներսում մարդու իրավունքների պաշտպանության միջավայրի բարելավումից, լրջագույն մարտահրավեր է նաև Ադրբեջանի վարքը: Ադրբեջանի կողմից շատ է ոտնահարվում արցախցիների իրավունքները, ինչպես պատերազմական, այնպես էլ խաղաղ իրավիճակներում՝ կյանքի իրավունքից մինչև կրթական ու սոցիալ-տնտեսական իրավունքներ: Ադրբեջանը սահմանափակում է ոչ միայն արցախցիների այլև օտարերկրացիների ազատ տեղաշարժվելու իրավունքները՝ նրանց ներառելով «սև ցուցակ»»,-մասնավորապես ասել է Ա. Բեգլարյանը:
Հանդիպման վերջում ուսանողները և դասախոսները հանդես են եկել հարցերով:
