Ստեփանակերտում կայացել է Բաքվի հայերի կոտորածների 100-րդ տարելիցին նվիրված միջազգային գիտաժողով
Արցախի գիտական կենտրոնի, ՀՀ գիտությունների ազգային ակադեմիայի պատմության ինստիտուտի և Սանկտ-Պետերբուրգի հայկական ազգային մշակութային ավտոնոմիայի համատեղ նախաձեռնությամբ Ստեփանակերտի «Եվրոպա» հյուրանոցի կոնֆերանս դահլիճում այսօր տեղի է ունեցել «Բաքու 1918. հայերի ցեղասպանության շարունակությունը» թեմայով միջազգային գիտաժողով՝ նվիրված Բաքվի հայերի կոտորածների 100-րդ տարելիցին:
Ստեփանակերտում կայացել է Բաքվի հայերի կոտորածների 100-րդ տարելիցին նվիրված միջազգային գիտաժողով
ՍՏԵՓԱՆԱԿԵՐՏ, սեպտեմբերի 17, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել գիտաժողովի կազմակերպիչ Վահան Բաբախանյանը:Նա ասել է, որ գիտաժողովը մեկնարկել է Երևանում սեպտեմբերի 14-ին:
Նրա խոսքով՝ գիտաժողովին Ռուսաստանի Դաշնությունից, ԱՄՆ-ից, ՀՀ-ից և ԱՀ-ից մասնակցում է 30 հոգի. նրանք ներկայացել են զեկույցներով:
Ըստ Վ. Բաբախանյանի՝ գիատաժողովի նպատակն է, որպեսզի 1918 թվականի Բաքվի կոտորածները որակել որպես ցեղասպանություն:
«Այս տարի սեպտեմբերին մենք նշում ենք Բաքվում տեղի ունեցած հայերի ջարդերի 100-ամյակը: Այս գիտաժողովի զեկույցները պետք է հրապարակվեն տարբեր լեզուներով և այն պետք է տարածել ամենուր, որովհետև դրանք իրական փաստեր են, որոնք խոսում են հայերի նկատմամբ կատարված ցեղասպանության մասին»,-մասնավորապես ասել է Վ. Բաբախանյանը:
ԱՀ Ազգային ժողովի փոխնախագահ Վահրամ Բալայանը, ԱՀ իշխանությունների անունից ողջունելով գիտաժողովի մասնակիցներին, ասել է, որ թեման արդիական է, և գաղտնիք չէ, որ այսօր պատերազմը ոչ միայն ռազմի դաշտում է, այլև քարոզչության ոլորտում, և այստեղ ևս պետք է մեզ դրսևորենք ըստ արժանվույն:
Վ. Բալայանն ասել է, որ ուրախալին այն է, որ նման գիտաժողովներին իրենց մասնակցությունն են բերում Հայաստան-Արցախ-Սփյուռք եռամիասնությունը:
Գիտաժողովին Վ. Բալայանը հանդես է եկել «1920 թվականի մարտի 23-ին Շուշիի հայության ջարդերը և դրանց հետևանքները» թեմայով զեկույցով, որում մասնավորապես ասել է. «Մուսավաթական Ադրբեջանի ցեղասպանական ծրագրերի շրջանակներում 1920 թվականի մարտի 23-ին հիմնահատակ կործանվել է դարերի ընթացքում հայ մարդու արարումի ուժով ստեղծված Անդրկովկասի երբեմնի մարգարիտ հանդիսացող բերդաքաղաք Շուշին: Ոչ միայն հայ ժողովրդի, այլև տարածաշրջանում ապրող մյուս քաղաքակիրթ ժողովրդների համար էլ հայոց Շուշին մեկ օրվա ընթացքում վերափոխվել և դարձել է դաժանության և մարդատյացության խորհրդանիշ: Բարեբախտաբար, Արցախյան շարժումը Շուշին ազատեց դժոխային այդ գերությունից»:
Արցախի գիտական կենտրոնի տնօրեն Ստեփան Դադայանի խոսքով էլ գիտաժողովի աշխատանքը, ըստ ընտրված թեմատիկայի, արդիական է մի քանի տեսանկյունից, հատկապես, որ նրա մասնակիցները կարևորել են միջոցառման երկրորդ մասն անցկացնել Արցախում՝ դրանով ընդգծելու համար միջազգային գիտաժողովի քաղաքական մեծ նշանակությունը:
Խոսելով գիտաժողովի թեմայի մասին՝ Ս. Դադայանն ասել է, որ Ադրբեջանը, որպես երիտթուրքերի և մուսավաթների համատեղ ջանքերով հորինված և ստեղծված արհեստական քաղաքական գոյացում, այն իր նորամուտը 1918 թվականի սեպտեմբերին նշանավորել է հայերի հսկայական կոտորածներով:
«Բաքուն ցանկություն է ունեցել տիրանալ հայության կողմից դարեր շարունակ ստեղծած հոգևոր և նյութական պատմական հարստությանը: Եթե նախկինում Ադրբեջանի ղեկավորությունը հերքել է հայերի նկատմամբ այս հանցագործությունների կազմակերպման իր մասնակցությունը, ապա այսօր այդ պետության նախագահը բացեիբաց հայտարարում է նոր ջարդեր սկսել այժմ արդեն ինքնիշխան երկու հայկական պետությունների նկատմամբ»,-ավելացրել է Ս. Դադայանը:
Գիտաժողովին կարդացվել են նաև Մեծ Բրիտանիայի և Հյուսիսային Իռլանդիայի Միացյալ Թագավորության լորդերի պալատի անդամ բարոնուհի Քերոլայն Քոքսի և հայ գենի պապանման ֆոնդի նախագահ Հռիփսիմե Թամազյանի շնորհավորական ուղերձները:
Գիտաժողովին մասնակիցները հանդես են եկել նաև հարցադրումներով: