Այսօր Ադրբեջանի կողմից իրականացվող տեղեկատվական քարոզչությունն ամբողջությամբ ուղղված է դեպի Հայաստանի ներքաղաքական խնդիրները:
Ադրբեջանական քարոզչությունն ամբողջությամբ ուղղված է ՀՀ ներքաղաքական խնդիրներին. մեդիափորձագետ
ՍՏԵՓԱՆԱԿԵՐՏ, սեպտեմբերի 19, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է տեղեկատվական տեխնոլոգիաների և անվտանգության հարցերով մեդիափորձագետ Սամվել Մարտիրոսյանը՝ նշելով, որ Հայաստանի և Ադրբեջանի միջև տեղեկատվական պայքարում այսօր հայկական կողմի տեղեկատվական քարոզչության իրականացումն ավելի թույլ է:
«Մեր կողմից իրականացվող տեղեկատվական քարոզչությունը կարելի է համարել սառեցված: Միայն ՀՀ-ում ներքաղաքական հարցերի հարթեցումից հետո կարելի է տեղեկատվական քարոզչության մասով լուծումներ գտնել, քանի որ այն մեդիադաշտում բավականին մեծ ռեսուրսներ է պահանջում»,- մասնավորապես ասել է Ս. Մարտիրոսյանը:
Ըստ փորձագետի՝ 2009 թվականին Հայաստանում ընդունված տեղեկատվական անվտանգության հայեցակարգը ևս պետք է ամբողջովին վերանայվի: Մտահոգիչ է նաև հայկական մեդիադաշտում ֆեյք-օգտատերերի առկայության հարցը, որը լուրջ վտանգ է ներկայացնում ապատեղեկատվության տարածման և այլ հարցերում:Տեղեկատվական դաշտը շարունակ փոփոխվում է և պետք է կարողանալ ժամանակին համարժեք ճիշտ քայլեր ձեռնարկել:2016 թվականի ապրիլյան քառօրյա պատերազմը մեծ ազդեցություն է ունեցել այդ դաշտում մի շարք հարցեր վերանայելու ուղղությամբ:
Ս. Մարտիրոսյանի խոսքով՝ տեղեկատվական անվտանգության դաշտի զարգացումը պահանջում է կոմպլեքս լուծում՝ կրթական համակարգի վերանայման, լրագրողների ուսուցման, լսարանի արդիական ընկալման և այլ տարբեր միջոցներով:
