«Հայաստան» համահայկական հիմնադրամի և ԱՀ պետական բյուջեի համաֆինանսավորմամբ Ստեփանակերտի Տիգրան Մեծի 33 շենքի առաջին հարկի ոչ բնակելի տարածքում շարունակվում են նոր մանկապարտեզի շինարարական աշխատանքները:
2019-ին Ստեփանակերտում նոր մանկապարտեզ կբացվի
ՍՏԵՓԱՆԱԿԵՐՏ, սեպտեմբերի 21, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Արաքս գրուպ» ՍՊ ընկերության գլխավոր ինժեներ Դավիթ Մարությանն ասել է, որ շինության ապամոնտաժման աշխատանքներն սկսվել են դեռևս 2018 թվականի փետրվարից:
Նրա խոսքով՝ ներկայումս ավարտվել են շինության ներքին ու արտաքին հարդարման աշխատանքները, տեղադրվել՝ պատուհաններ, դռներ, կառուցվել՝ ցանկապատ:Բակում կառուցվել է նաև 2 խաղահրապարակ և 3 բացօթյա տաղավարներ:
«Աշխատանքների մեծ մասն ավարտված են: Անհրաժեշտ է իրականացնել նաև ներքին և արտաքին ներկարարական աշխատանքներ, տարածքի բարեկարգում, տաղավարների տանիքների տեղադրում, կահավորում»,-տեղեկացրել է մեր զրուցակիցը՝ հավելելով, որ մանկապարտեզը նախատեսված է 54 երեխայի համար:
Դ. Մարությանը նշել է նաև, որ մանկապարտեզը շահագործման է հանձնվելու 2019 թվականի սկզբներին:
