Ստեփանակերտի քաղաքապետարանում այսօր տեղի է ունեցել պարգևատրման արարողություն՝ նվիրված մայրաքաղաքի անվանակոչման 95-ամյակին:
Ստեփանակերտի քաղաքապետարանում տեղի է ունեցել պարգևատրման արարողություն
ՍՏԵՓԱՆԱԿԵՐՏ, սեպտեմբերի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Ստեփանակերտի քաղաքապետ Սուրեն Գրիգորյանը:
Նա շնորհավորել է ներկաներին մայրաքաղաքի անվանակոչման 95-ամյակի կապակցությամբ՝ ասելով, որ նման առիթները հնարավորություն են տալիս հետադարձ հայացք ձգել դեպի անցյալը, վերարժևորել անցած տարիների ընթացքում ստեղծված նյութական և հոգևոր արժեքները, ըստ արժանվույն գնահատել ներկան ու նախանշել ապագայի անելիքները:
«Ստեփանակերտի զարգացման պատմությունը սկիզբ է առել դարերի խորքերից: Այն ժամանակ, երբ Արցախն ինքնավար մարզի կարգավիճակով գտնվում էր Ադրբեջանի կազմում, մենք հնարավորություն չունեինք մեր քաղաքն ըստ հայկական պատմամշակութային ավանդույթների կառուցել: Այլ է հիմա իրավիճակը. Ստեփանակերտը տարեցտարի փոխվում է՝ բարեկարգվում են փողոցներն ու ճանապարհները, բազմաբնակարան շենքերի բակերը, պուրակները: Կառուցվում են նոր բնակելի թաղամասեր և տներ, դպրոցներ, մանկապարտեզներ ու խաղահրապարակներ, առողջապահության մի շարք օբյեկտներ: Քաղաքապետարանն ԱՀ իշխանությունների աջակցությամբ անում է ամեն ինչ, որ Ստեփանակերտը՝ որպես հանրապետության մայրաքաղաք, ապահովվի իր առաջընթացն ու զարգացումը: Մենք պետք է քաջ գիտակցենք, որ Ստեփանակերտի բարեկարգումը, հասարակական կարգի պահպանումը ո՛չ միայն քաղաքային իշխանությունների խնդիրն է, այլև յուրաքանչյուրի»,-մասնավորապես ասել է Ս. Գրիոգորյանը:
Ստեփանակերտի քաղաքապետը մի խումբ ստեփանակերտցիների բարեխիղճ աշխատանքի, մայրաքաղաքին մատուցած ծառայությունների և Ստեփանակերտի օրվա առթիվ պարգևատրել է պատվոգրերով և արժեքավոր նվերներով:
Պարգևատրվածներից Ստեփանակերտի Հայկ Բալասանյանի անվան N5 հիմնական դպրոցի դասվար, քաղաքային մեթոդմիավորման նախագահ Ռենա Օհանյանն ասել է, որ իրենց շատ հաճելի է, որ գնահատվում և արժևորում են իրենց աշխատանքը:
Նա նշել է, որ Ստեփանակերտի զարգացման գործում ինքը ևս իր լուման ունի, որի համար էլ պարգևատրվել է:
«Այս պարգևը պարտավորեցնող է: Մատաղ սերնդի կրթության ու դաստիարակության գործում ես կշարունակեմ իմ՝ ուսուցչիս նվիրական առաքելությունը: Օգտվելով առիթից, շնորհավորում եմ ստեփանակերտցիներին՝ ցանկանալով հաջողություններ և նորանոր ձեռքբերումներ»,-ասել է Ռ. Օհանյանը:
