Նախօրեին «Թուֆենկյան» բարեգործական հիմնադրամը Քաշաթաղի շրջանի Բերձոր քաղաքում սիրիահայ Ցեզար Թաթլեյանի ընտանիքին նվիրել է բնակելի տուն:
«Թուֆենկյան» հիմնադրամի կողմից սիրիահայ ընտանիքը բնակելի տուն է նվեր ստացել
ՍՏԵՓԱՆԱԿԵՐՏ, սեպտեմբերի 25, ԱՐՑԱԽՊՐԵՍ: Այս մասին «Արցախպրես»-ին տեղեկացրին Քաշաթաղի շրջանային «Մերան» պաշտոնաթերթից՝ մանրամասնելով, որ միջոցառմանը ներկա «Թուֆենկյան» բարեգործական հիմնադրամի գործադիր տնօրեն Րաֆֆի Դուդակլյանը, Արցախի ծրագրերի կառավարիչ Էդվին Գրիգորյանը, «Թուֆենկյան» բարեգործական հիմնադրամի հոգաբարձուների խորհրդի անդամները և այլ հյուրեր ողջունել և շնորհավորել են բնակելի տան նոր տերերին՝ մաղթելով ամենայն բարիք:
Աղբյուրի հաղորդմամբ՝ Րաֆֆի Դուդակլյանը տեղեկացրել է, որ այս տարվա ընթացքում Արցախում վիրավոր զինծառայողներին բնակարանային հարմարավետ պայմաններով ապահովելու ծրագրի շրջանակներում շահագործման է հանձնվել 5 տուն, իսկ «Արցախ Ֆոնդ» կազմակերպության ԱՄՆ մասնաճյուղի համաֆինանսավորմամբ էլ 6 տուն հանձնվել է Առաջամուղում:
Այս օրերին նախատեսվում է ևս մեկ տուն հանձնել զոհված զինվորականի ընտանիքի Մարտունու շրջանի Կարմիր շուկա և 2 տուն՝ Քաշաթաղի շրջանի Գետամեջ և Վան համայնքներում:
Ցեզար Թաթելյանը հայրենիք է եկել Դամասկոսից 5 տարի առաջ, երբ Սիրիայում պատերազմ էր սկսվել: Ստեփանակերտում է հանդիպել ապագա կնոջը, ում հետ մինչ այդ ծանոթ է եղել սոցիալական ցանցից: Տեղեկացրեց, որ ունի ճարտարագետի մասնագիտություն և աշխատանքի է անցնելու «Քաշաթաղի ջրամատակարարում» ՓԲԸ-ում:
Նշենք, որ «Թուֆենկյան» բարեգործական հիմնադրամը մեկ ու կես տասնամյակ է, ինչ իր օժանդակությունն է ցուցաբերում Արցախի կայացման գործին: Բազում բարեգործական ծրագրեր է իրականացրել նաև Քաշաթաղի շրջանում՝ բնակարանաշինություն, դպրոցաշինություն, այգիների հիմնում, ջրատարների բարեկարգում, պատմական հուշարձանների նորոգում և այլն:
Լուսանկարները՝ «Թուֆենկյան» հիմնադրամի և «Մերան» պաշտոնաթերթի
