Ստեփանակերտի «Վալլեքս Գարդեն» հյուրանոցի մեծ դահլիճում այսօր տեղի է ունեցել ԱՀ մարդու իրավունքների պաշտպան (ՄԻՊ) Ռուբեն Մելիքյանի մամլո ասուլիսը:
Ադրբեջանում հայատյացության վերաբերյալ ԱՀ ՄԻՊ զեկույցը հասանելի է հանրությանը. Ռուբեն Մելիքյանի ասուլիսը
ՍՏԵՓԱՆԱԿԵՐՏ, սեպտեմբերի 25, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ասուլիսին ներկայացվել է ԱՀ ՄԻՊ «Հայատյացությունն Ադրբեջանում. կազմակերպված ատելության խոսքն ու թշնամությունն ընդդեմ հայերի» հատուկ զեկույցը:
Խոսելով զեկույցի մասին՝ Ռ. Մելիքյանն ասել է, որ իրենք զեկույցի փաստահավաք աշխատանքներն սկսել են 2016 թվականի ապրիլյան պատերազմի առիթով: Առաջին զեկույցը երկու ուղղվածություն ունի՝ դաժանությունների և մարդու իրավունքների խախտումների փաստերը, որ ադրբեջանական զինված ուժերը թույլ էին տվել քաղաքացիական բնակչության, Ադրբեջանի վերահսկողության ներքո հայտնված Արցախի պաշտպանության բանակի զինծառայողների նկատմամբ, և երկրորդ՝ այն պատճառները, որոնք հանգեցրել են այդպիսի լուրջ խախտումների:
ԱՀ ՄԻՊ-ը նշել է, որ 2016 թվականին իրենք նաև հրապարակել են լրացուցիչ զեկույց, որտեղ ավելի հանգամանալից ներկայացվել են ադրբեջանական զինված ուժերի կողմից թույլ տրված վայրագությունների փաստերը: Եվ հիմա, ավարտելով փաստահավաքի արդյունքները, իրենք ներկայացրել են դրանց պատճառները: Գլխավոր պատճառը կազմակերպված հայատյացության քաղաքականությունն է, որ իրականացնում է Ադրբեջանի Հանրապետությունը: Հրապարակված զեկույցը ԱՀ ՄԻՊ www.ombudsnkr.am պաշտոնական կայքում և սոցիալական ցանցերի միջոցով արդեն հասանելի է հանրությանը: Այս զեկույցի մշակմանը աջակցել է Թուֆենկյան բարեգործական հիմնադրամը և զեկույցի փորձագիտական խմբի անդամներ՝ ադրբեջանագետ Անժելա Էլիբեկովան, իրավաբան մասնագետներ Եղիշե Կիրակոսյանը և Լևոն Գևորգյանը:
Խոսելով անգլերեն լեզվով հրապարակված զեկույցի հայեցակարգից՝ Ռ. Մելիքյանն ավելացրել է. «Մենք առաջինը չենք, որ խոսում ենք Ադրբեջանում հայատյացության մասին: Մենք փորձել ենք զեկույցի շրջանակներում փաստերը համադրել իրավունքի հետ: Իրականացնելով այս աշխատանքը՝ մենք այն դիտարկում ենք 3 տեսանկյունից: Առաջինն այն է, որ հայաստանյան հանրությունը ոչ այնքան լրիվությամբ է ծանոթ Ադրբեջանում հայատյացության մակարդակին: Մեր զեկույցի փաստահավաք արդյունքները ցույց են տալիս, որ դրանք կազմակերպված բնույթ են կրում, և մենք գիտենք, որ կազմակերպված ատելությունն ուղղակի այդ մակարդակում չի մնում. այն ծանր հետևանքների է հանգեցնում: Հանրությունը պետք է ավելի ամբողջական տեղեկացված լինի այդ ամենից: Զեկույցի երկրորդ ուղերձը ուղղված է միջազգային հանրությանը: Մենք պետք է հնարավորինս միջազգային հանրությանը հասկանալի լեզվով և օբյեկտիվ ներկայացնենք այն իրողությունները, որոնք առկա են: Երրորդն ուղղված է Արցախի և Հայաստանի հանրությանը. զեկույցի փաստերը չպետք է մեզ մոտ ատելություն սերմանեն: Վստահ ենք, որ մեր գործընկերները կնպաստեն զեկույցի տարածմանը տարբեր միջազգային կառույցներում, հատկապես միջազգային իրավապաշտպան հանրության շրջանակներում: Ինչպես նախորդ զեկույցներն են օգտագործվել միջազգային հեղինակավոր տարբեր կառույցների կողմից, այնպես էլ այս զեկույցը կհասնի իր հասցեատերերին: Զեկույցն ունի փաստական և իրավական կողմեր»:Ասուլիսին մասնակցել են նաև Թուֆենկյան բարեգործական հիմնադրամի գործադիր տնօրեն Րաֆֆի Դուդակլյանը և զեկույցի մշակման աշխատանքներում ընդգրկված ադրբեջանագետ Անժելա Էլիբեկովան։
Ր. Դուդակլյանը շնորհակալություն է հայտնել ԱՀ ՄԻՊ-ին գնահատելի աշխատանք իրականացնելու համար: Նա ևս ընդգծել է, որ Ադրբեջանում հայատյացությունը կազմակերպված և շարունակական բնույթ է կրում: «Մենք խնդիր ունենք լրջորեն հետևել Ադրբեջանի կառավարության հովանավորած հակահայ քարոզչությանը և բացահայտել հայատյացության բոլոր դրսևորումները: Մենք պատրաստ ենք աջակցել նման աշխատանքների իրականացմանը»,-մասնավորապես ասել է Ր. Դուդակլյանը:
Ասուլիսին Եղիշե Կիրակոսյանը տեսաուղերձի միջոցով ներկայացրել է «Հայատյացությունն Ադրբեջանում. կազմակերպված ատելության խոսքն ու թշնամությունն ընդդեմ հայերի» զեկույցի իրավական կողմը:
Նշենք, որ ԱՀ ՄԻՊ ֆեյսբուքյան էջում ասուլիսը հեռարձակվել է ուղիղ եթերով:
