Այսօր՝ սեպտեմբերի 25-ին, Ստեփանակերտում տեղի է ունեցել «Թուֆենկյան» բարեգործական հիմնադրամի՝ Արցախում գործունեության 15-ամյակին նվիրված տոնական միջոցառում:
«Թուֆենկյան» հիմնադրամն ամփոփել է իր արցախյան գործունեության 15-ամյակը
ՍՏԵՓԱՆԱԿԵՐՏ, սեպտեմբերի 25, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը ներկայացվել է ֆոտոցուցահանդես, որի ընթացքում ներկաները հնարավորություն են ունեցել տեսնելու կատարված աշխատանքների արդյունքը լուսանկարների միջոցով:
Իր խոսքում «Թուֆենկյան» հիմնադրամի գործադիր տնօրեն Րաֆֆի Դուդակլյանն ասել է, որ 15 տարիների ընթացքում իրենք սերտ համագործակցել են ԱՀ կառավարության հետ:
«15 տարի է, ինչ մենք Արցախում ենք: Աշխատելով Արցախի ամենահեռավոր և խոցելի համայնքներում՝ մենք կառուցել ենք տներ, մանկապարտեզներ, կլինիկաներ, բնակարաններով ապահովել վիրավոր ազատամարտիկներին և վերաբնակիչներին»,- նշել է Ր. Դուդակլյանը:
Միջոցառմանը ներկա Արցախի Հանրապետության նախագահի խորհրդական, նախագահի հատուկ հանձնարարությունների գծով ներկայացուցիչ Արայիկ Հարությունյանն էլ հիշեցրել է 2008 թվականին Բերձորում կայացած պատմական միջոցառումը, որին մասնակցել են հայկական բարեգործական գրեթե բոլոր կազմակերպությունները:
««Թուֆենկյան» բարեգործական հիմնադրամի տնօրինությունն առաջարկություն էր ներկայացրել Քաշաթաղի շրջանի զարգացման համար: Նպատակը առաջին հերթին վերաբնակեցումն էր: Հիմնադրամը և ԱՀ կառավարությունը համատեղ սկիզբ էին դրել «ԱՐԻ» ծրագրին: Քաշաթաղի շրջանում իրականացվել է նաև բնակարանների վերանորոգման ծրագիր, որը դարձել էր պետական: «Թուֆենկյան» հիմնադրամի հետ ծրագրեր է սկսել իրագործել նաև «Հայրենասեր» կազմակերպությունը՝ ի դեմս համահիմնադիր Ստեփան Սարգսյանի, ով այսօր այստեղ է: Այն, ինչի սկիզբ է դրել «Թուֆենկյան» հիմնադրամը, պետք է շարունակել»,- ասել է Ա. Հարությունյանը:
ԱՀ պետական նախարար Գրիգորի Մարտիրոսյանն էլ նշել է, որ ցանկացած հոբելյանի առիթով ընդունված է ի մի բերել արդյունքները, այսօր, սակայն, կարիք չկա թվարկելու բոլոր այն աշխատանքները, որոնք «Թուֆենկյան» հիմնադրամն ԱՀ կառավարության հետ համատեղ իրականացրել է Արցախում:
«Այդ աշխատանքներն անգնահատելի են: Մենք պետք է հայացք ուղղենք առաջ և նախանշենք այն ծրագրերը, որոնք կիրականացնենք առաջիկա 15 տարվա ընթացքում: Վստահ եմ՝ 15 տարի անց կարձանագրենք ոչ պակաս կատարված ծավալուն աշխատանքներ: Համագործակցության այն մակարդակը, որը այս տարիների ընթացքում տեղ է գտել ԱՀ կառավարության և հիմնադրամի միջև, կարելի է գնահատել որպես օրինակելի»,- ասել է Գ. Մարտիրոսյանը:
Իսկ Քաշաթաղի վարչակազմի ղեկավարի տեղակալ Արտուշ Մխիթարյանը նշել է, որ հիմնադրամը բազմաթիվ ծրագրեր է իրականացրել իրենց շրջանում:
«Այդ ընթացքում մենք զգացել ենք, որ Սփյուռքի մեր հայրենակիցները մեր կողքին են: Մենք մեզ զգում ենք ավելի ամուր, վստահ և պարտավորված: Քաշաթաղը մի շրջան է, որի բնակեցումը և ավելի գեղեցիկ դառնալը պետք է լինի հոգու պարտք: Շրջանի յուրաքանչյուր թիզ հող սրբացած է արյամբ»,- ավելացրել է Ա. Մխիթարյանը:
Այնուհետև տեղի է ունեցել Արցախի հետագա զարգացման և վերաբնակեցման թեմայով կլոր սեղան-քննարկում:
Միջոցառմանը ներկա էին պաշտոնատար անձինք, հյուրեր և այլք:
