Ստեփանակերտի մշակույթի և երիտասարդության պալատում կայացել է Արցախի «Մռակած» պետական կամերային երգչախմբի «Happy day» համերգային նոր ծրագիրը:
«Մռակած» պետական կամերային երգչախումբը Ստեփանակերտում հանդես է եկել նոր ծրագրով (լուսանկարներ)
ՍՏԵՓԱՆԱԿԵՐՏ, սեպտեմբերի 29, ԱՐՑԱԽՊՐԵՍ: Համերգին հնչել են ժամանակակից արտասահմանյան երգահանների ստեղծագործություններ:
«Արցախպրես»-ի թղթակցի հետ զրույցում «Մռակած» պետական կամերային երգչախմբի գեղարվեստական ղեկավար և խմբավար, հանրապետության արվեստի վաստակավոր գործիչ Մարինե Մեսրոպյանն ասել է, որ երչախումբն իր գործունեությունն սկսել է 2000 թվականից:
Նրա խոսքով՝ իրենք համերգային ծրագրեր են իրականացրել Ռուսաստանի Դաշնության մայրաքաղաք Մոսկվայում, իսկ մրցույթներով էլ հանդես են եկել արտասահմանյան մի շարք երկրներում:
«Մեր երգչախումբն այս անգամ փորձել է հանդես գալ ամբողջովին նոր ծրագրով: Մենք հանդիսատեսին ներկայացել ենք նոր ձևաչափով ու նոր ոճով: Բեմի վրա մեր երգչախումբն իր բոլոր կատարումները ցուցադրել է պարային համապատասխան շարժումներով: Այս կերպ փորձում ենք «Մռակած»-ին նոր շունչ հաղորդել»,-ասել է Մ. Մեսրոպյանը՝ տեղեկացնելով, որ հատուկ համերգի համար իրենք Երևանից հրավիրել են «Բիթբոքս» երգարվեստի մասնագետ, քանի որ իրենց համերգի բովանդակությանը համապատասխանում է այդ ոճին:
ՀՀ «Բիթբոքս» ասոցացիայի անդամ, Հայաստանի չեմպիոն Հայկ Սնխչյանն ասել է, որ բիթբոքսը ռիթմիկ նկարների (բիթերի) և մեղեդու՝ ձայնային ապարատի ու բերանի օրգանների միջոցով արտաբերման, ստեղծման և նմանակման արվեստ է։ Հաճախ բիթբոքս կատարումները ներառվում են հիփ-հոփ կատարումներում։
««Մռակած» երգչախմբի հետ աշխատանքս շատ հաջող է ստացվել: Մեր բիթբոքսը հարմոնիկ ներդաշնակում է երգչախմբին: Այս երգարվեստը փորձելու ենք ավելի զարգացնել ու մասսայականացնել Հայաստանում և Արցախում»,- ավելացրել է Հ. Սնխչյանը:
Համերգին ներկա էին ԱՀ կրթության, գիտության և սպորտի նախարար Նարինե Աղաբալյանը, Ազգային ժողովի պատգամավորներ, արվեստասեր հասարակություն:
