Աշխարհահռչակ «Armenian Navy Band» խմբի ղեկավար Արտո Թունջբոյաջյանը հոկտեմբերի 7-ին ելույթ կունենա Ստեփանակերտի Վահրամ Փափազյանի անվան պետական դրամատիկական թատրոնի շենքում:
Աշխարհահռչակ երգիչ Արտո Թունջբոյաջյանը ելույթ կունենա Ստեփանակերտում
ՍՏԵՓԱՆԱԿԵՐՏ, հոկտեմբերի 5, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ հոկտեմբերի 5-ին «ARTSakh Fest» ժամանակակից արվեստի փառատոնին նվիրված մամուլի ասուլիսին ասել է հանրահայտ երգիչը՝ մանրամասնելով, որ փառատոնը նպատակ ունի վերականգնելու Ստեփանակերտի թատրոնի շենքը:
«Գաղափարը պետք է կյանքի կոչել և դարձնել շարունակական: Թատրոնի շենքը դեռևս կենդանի է և ասելիք ունի հասարակությանը: Ինձ համար կարևոր է մեկ գաղափարի շուրջ Հայաստանում, Արցախում և Սփյուռքում ապրող հայությանը համախմբելը»,- ասել է Ա. Թունջբոյաջյանը:
Ասուլիսին նախագծի հեղինակ, արվեստի անկախ համադրող, Երևանի Ժամանակակից Արվեստի Ինստիտուտի ծրագրերի ղեկավար Աննա Կամայը նշել է, որ փառատոնի նպատակը թատրոնի շենքի վերականգնման հարցը բարձրացնելն է ամբողջ աշխարհում և ժամանակակից արվեստի մեդիաների միջոցով խնդրի լուծումը գտնելը:
«Ստեփանակերտի սրտում գտնվող այս պատմական մշակութային կոթողը պետք է նոր շունչ ստանա, մենք էլ արվեստագետների օգնությամբ փորձելու ենք նոր կյանք տալ նախագծին: Այս ընթացքում վերականգնել ենք թատրոնի հարակից տարածքը, աստիճանները, բեմահարթակը, սալահատակը, շենքը մաքրվել և էլեկտրաֆիկացվել է:
Փառատոնը տևելու է 3 օր: Ծրագրի մեջ ներառվելու են հետազոտական ցուցահանդես, վավերագրական լուսանկարչություն, բացօդյա պերֆորմանսներ, ձայնային արվեստ (sound art), տեսանկար (video art) և ժամանակակից արվեստի այլ տեսակներ»,- ասել է Ա. Կամայը:
Ժամանակակից արվեստի ինստիտուտի հիմնադիր Նազարեթ Կարոյանն էլ նշել է, որ փառատոնի շրջանակներում փորձելու են ցույց տալ արվեստի ամբողջականությունը՝ իբրև նոր հոգևոր էություն:
«Թատրոնը Ստեփանակերտի սիրտն է, և ստեփանակերտցիների միանալը նախագծին իրենց կոթողներին տեր կանգնելու իմաստն ունի: Իսկ մենք կփորձենք վառ պահել ստեղծագործականությունը խորհրդանշական արարքով՝ աշխատանքի ավարտին լուսավորելով շենքն արտաքնապես»,- ավելացրել է Ն. Կարոյանը:
Մամլո ասուլիսին ներկա հետազոտական ցուցահանդեսի համադրող էմմա Հարությունյանն էլ նշել է, որ ինքը փառատոնին ներկայացնելու է, թե ինչ կարևորություն է ունեցել թատրոնը ստեփանակերտցիների կյանքում:
«Վստահ եմ՝ Ստեփանակերտում ապրող յուրաքանչյուր քաղաքացի մեծ սիրով է հիշում թատրոնը: Կարծում եմ՝ եթե կա թատրոն, ապա յուրաքանչյուրիս նպատակը պետք է լինի ստեղծել արվեստի այն մթնոլորտը, որը կգրավի մարդկանց, և այդ ամենով հանդերձ ամեն մեկը իր պարտքը կհամարի թատրոնի շենքի վերականգնման համար ներդրում անելը»,- ասել է Է. Հարությունյանը:
Մամուլի ասուլիսին նրանք պատասխանել են լրագրողների կողմից հնչեցված մի շարք հարցերի:
Նշենք, որ «ARTSakh Fest» ժամանակակից արվեստի փառատոնի պիլոտային թողարկման բացման արարողությունը կայանալու է այսօր երեկոյան՝ ժամը 19:00-ին:
Հավելենք, որ փառատոնն իրականացվում է ՀՀ մշակույթի և ԱՀ մշակույթի, երիտասարդության հարցերի ու զբոսաշրջության նախարարությունների, Շուշիի «Եզնիկ Մոզյան արհեստագործական ուսումնարան»-ի և Թուֆենկյան հիմնադրամի աջակցությամբ:
