2016 թվականի ապրիլյան քառօրյա պատերազմից հետո Կանադայի հայ համայնքն անմասն չմնաց սատար կանգնելու հայոց բանակին:
Կանադայի հայ համայնքն Արցախում մի շարք բարեգործական ծրագրեր է իրականացնում. բարերար
ՍՏԵՓԱՆԱԿԵՐՏ, հոկտեմբերի 5, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Կանադայի հայ համայնքի ներկայացուցիչ, բարերար Խորեն Մարդոյանը:
Ըստ նրա՝ ապրիլյան քառօրյա պատերազմը ցույց է տվել, որ հայ ժողովուրդը միշտ պետք է միասնական լինի՝ դիմակայելու թշնամու ցանկացած ագրեսիայի:
«Կանադայի, մասնավորապես Տորոնտոյի հայ համայնքը, բազմաթիվ բարեգործական ծրագրեր է իրականացրել Արցախում: Այս անգամ մենք այցելել ենք Մարտակերտի զորամաս, որտեղ նախատեսում ենք հիմնել համակարգչային դասարան: Տորոնտոհայ բժիշկների միության անդամները, ինչպես նախորդ տարիներին, այս տարի ևս, սատարում են Արցախին: Այս անգամ գալուց բերել ենք շնչառական ապարատներ և առաջին անհրաժեշտության բժշկական պարագաներ, որոնց մի մասը հանձնել ենք Մարտակերտի զորամասի բուժկետին, իսկ մնացածն էլ՝ կուղարկենք շրջանի զինվորական հոսպիտալ:Իսկ Ասկերանի զորանոցներից մեկում թվով 11 օդափոխիչ համակարգեր ենք տեղադրել: 2019 թվականի հուլիս-օգոստոս ամիսներին տորոնտոհայ բժիշկների միության հետ համատեղ շարունակելու ենք այդ ծրագիրը»,- ավելացրել է Խ. Մարդոյանը և ընդգծել՝ վորոնշյալ ծրագրերը պետք է կրեն շարունակական բնույթ:
Ողջունելով Արցախում կանադահայերի նախաձեռնած ծրագրերի իրականացումը, բարերարի հետ Արցախ ժամանած «Քաշաթաղի բազմազավակ ընտանիքների» հիմնադրամի նախագահ Գուրգեն Մելիքյանն ասել է, որ իրենք կարողացան օգնել այն մարդկանց ովքեր պաշտպանում են հայրենիքի սահմանները, որի ամեն մի թիզ հողը սուրբ է յուրաքանչյուր հայի համար:
Նշենք, որ Արցախի Հանրապետության Նախագահ Բակո Սահակյանը այսօր՝ հոկտեմբերի 5-ին, ընդունել է կանադահայ բարերար Խորեն Մարդոյանին և «Քաշաթաղի բազմազավակ ընտանիքների» հիմնադրամի նախագահ Գուրգեն Մելիքյանին:
