ՍՏԵՓԱՆԱԿԵՐՏ, հոկտեմբերի 11, ԱՐՑԱԽՊՐԵՍ: Ամենայն  հայոց  բանաստեղծ     Հովհաննես  Թումանյանի մի քանի ստեղծագործությունների  հիման  վրա արցախցի  գրող  Վազգեն Օվյանի  գրած  «Մեծ  լոռեցին» պիեսը    հիմք      ընդունելով՝ բեմադրվել  է  «Աշխարհը   լոռվա  ձորերում»  թատերական   ներկայացումը:

Բեմադրությանը մասնակցում էին Ստեփանակերտի Վահրամ Փափազյանի անվան պետական դրամատիկական թատրոնի երիտասարդ  և ավագ  սերունդների դերասանները:

«Արցախպրես»-ի  թղթակցի  հետ  զրույցում   Ստեփանակերտի Վահրամ Փափազյանի անվան պետական դրամատիկական թատրոնի գեղարվեստական ղեկավար Ռուզաննա Խաչատրյանն  ասել  է, որ   պիեսն  Ստեփանակերտում   առաջին անգամ  բեմադրվել  էր  50  տարի  առաջ՝  Հովհ.  Թումանյանի    ծննդյան  100-ամյակի  առիթով:

«Այսօր  մենք   նորից  անդրադարձել  ենք  այդ   պիեսին,  քանի  որ   մեծ   լոռեցու ստեղծագործությունները  բոլոր   ժամանկներում  արդիական  են: Վ.  Օվյանի գրած  «Մեծ  լոռեցին» պիեսի վերնագիրը   մենք  փոխել ենք՝ դարձնելով  այն  «Աշխարհը   լոռվա  ձորերում»,  և   ստացել   նոր  բեմադրություն: Մենք   փորձել  ենք  ռեժիսորական  նոր մոտեցումներով  ներկայացնել   պիեսը: Կարծում  եմ՝     այն     կհետաքրքրի  թե՛   փոքրերին  և  թե՛  մեծերին»,-մասնավորապես   ասել  է  Ռ.  Խաչատրյանը: 

Նա  նշել  է նաև,  որ   իրենք   այդ   բեմադրությունը  ներկայացրել  են  Արցախի   գրեթե  բոլոր   շրջկենտրոններում:    

Ըստ  մեր   զրուցակցի    տեղեկացման՝  մի  քանի  օր  առաջ   Ստեփանակերտի   Վահրամ  Փափազյանի  անվան   դրամատիկական    թատրոնը   մասնակցել  է     «Թատերական Լոռի»   միջազգային   փառատոնին, որը   նվիրված   էր  Հովհ.  Թումանյանի  150-ամյակին:

«Լոռվա  հանդիսատեսի  կողմից ներկայացումը  մեծ   խանդավառությամբ     է   ընդունվել: Մեր  թատերախումբը     կարողացել  է մրցանակային   տեղեր    և  մրցանակներ    գրավել»,-ավելացրել  է  Ռ. Խաչատրյանը:  

Բեմադրությանը  ներկա  ԱՀ  մշակույթի, երիտասարդության  հարցերի  և  զբոսաշրջության  նախարար  Լեռնիկ  Հովհաննիսյանի  խոսքով՝ մշակութային  կյանքում  ինքը   շատ  է  կարևորում     թատրոնի   դերը:

«Պետք է  Արցախում  գործող թատերական  խմբերը՝  Ստեփանակերտի  Վահրամ Փափազյանի  անվան  դրամատիկական   և   Շուշիի  Մկրտիչ  Խանդամիրյանի  անվան պետական    թատրոններն  էլ  ավելի  ակտիվ  գործունեություն  ծավալեն: Վերջին  շրջանում  Արցախոււմ  աշխուժացել  է  թատերական   կյանքը: Այս  տարի   թատերական  հյուրախաղերով  Արցախում  են  եղել  Գյումրիի Վարդան  Աճեմյանի    անվան  դրամատիկական  և  Սոս Սարգսյանի անվան   համազգային   թատրոնները: Արցախում  գործող  թատրոններն  էլ  հյուրախաղերով հանդես  են   եկել ՀՀ  մի   շարք  մարզերում: Պետք   է   ամեն  ինչ  անենք, որ   հասարակության  ուշադրությունը  սևեռվի   Արցախի   մայր  թատրոնի  շենքի   վերակառուցման  գործին: Մենք   պետք  է        կարողանանք  վերականգնենք  Արցախի  թատրոնի երբեմնի  փառքը, որպեսզի    թատրոնի    հոյակերտ  շենքն  իր  հյուրընկալ   դռները   բացի     թատերասեր  հասարակության  առաջ»,-  ասել  է  նախարարը:

Խոսելով   թատրոնից   ստացած   իր    տպավորությունների  մասին հանդիսատես    Լիլիթ  Իսրայելյանն ասել է, որ    ինքը   շատ  է  հավանել ներկայացումը, քանի  որ  այն  արդիկան, դաստիարակչական  և  ճաշակի   ձևավորման  հիմքեր  ունի:

Լ.  Իսրայելյանը    նշել  է, որ   արցախցի   հանդիսատեսը  սպասում  է  Արցախի   մայր  թատրոնի    շենքի  վերակառուցմանը, որը  հնարավորություն  կտա, որպեսզի    իրենք   նորից   գեղագիտական  հաճույք վայելեն բեմադրված  ներկայացումներից:

 

Միջոցառմանը   ներկա  էին   Արցախի թեմի  առաջնորդ  Պարգև  արքեպիսկոպոս  Մարտիրոսյանը, պաշտոնատար  այլ  անձինք, արվեստասեր  հասարակություն: