Artsakhpress

Մշակույթ

Ավելի քան 1000 մասնակից. Արցախում աճեցրած արևադարձային մրգերը զարմացրել են այցելուներին

Այսօր՝ հոկտեմբերի 14-ին, Ստեփանակերտի Վերածննդի հրապարակում, Գյուղատնտեսության աշխատողի օրվան նվիրված, կազմակերպվել է «Բերքի տոն»:

Ավելի քան 1000 մասնակից. Արցախում աճեցրած արևադարձային մրգերը զարմացրել են այցելուներին

Ավելի քան 1000 մասնակից. Արցախում աճեցրած արևադարձային մրգերը զարմացրել են այցելուներին
ՍՏԵՓԱՆԱԿԵՐՏ, հոկտեմբերի 14, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ տոնավաճառին Արցախի բոլոր շրջանները և ՀՀ-ում ու ԱՀ-ում գործող մի շարք ընկերություններ ներկայացրել և վաճառքի են հանել իրենց արտադրանքը:
Բերքն ու բարիքն օրհնել է Հայ առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը:
Այնուհետև ԱՀ Նախագահ Բակո Սահակյանը պաշտոնատար այլ անձանց ուղեկցությամբ շրջել է տաղավարներում, ծանոթացել ներկայացված գյուղատնտեսական մթերքներին և արտադրատեսակներին:
Մեզ հետ զրույցում ԱՀ գյուղատնտեսության փոխնախարար Վիլեն Ավետիսյանն ասել է, որ միջոցառումը կազմակերպվում է արդեն 8-րդ անգամ:
«Այս տոնակատարությունը նախորդներից տարբերվում է նրանով, որ ներգրավվել են ավելի շատ թվով մասնակիցներ: Բացի Վերածննդի հրապարակից, փառատոնի տաղավարներ տեղադրվել են նաև ԱՀ Նախագահի նստավայրին և կառավարության շենքին հարակից փողոցներում և ընդգրկել Թումանյան փողոցը: Այս տարի ներկայացվել է 1000-ից ավելի մասնակից՝ նախորդ տարվա 850-ի փոխարեն:
Տոնավաճառի ընթացքում նախատեսվում են նաև հետաքրքիր անակնկալներ՝ «Լավագույն շրջան», «Լավագույն վերամշակող կազմակերպություն», «Լավագույն մշակութային կատարում» և «Ամենացածր գին» անվանակարգերով մրցույթի տեսքով: Վերջին անվանակարգն ավելացել է այս տարի: Այդ նպատակով ստեղծվել են աշխատանքային խմբեր, որոնք արձանագրում են նախապես համարակալված բոլոր տաղավարների գները: Ամենացածր գներ առաջարկող երեք տաղավարներ արժանանալու են թանկարժեք նվերների»,- մանրամասնել է Վ. Ավետիսյանը:
Մարտունու շրջվարչակազմի ղեկավարի տեղակալ Էդուարդ Բարսեղյանն ասել է, որ շրջանի 35 համայնքներ ներկայացրել են 28 տաղավար:
«Նախորդ տարվա համեմատ՝ այս տարի Մարտունու շրջանից մասնակցողների քանակն ավելացել է: Տաղավարներում էլ փորձել ենք բերքն ու բարիքը վաճառել շուկայականից ցածր գներով: Գյուղատնտեսական տարին բարենպաստ էր, ինչն էլ նպաստել է, որ շրջանն այսօր ներկայանա առատ բերք ու բարիքով, որը յուրահատուկ է մեր բնակլիմայական պայմաններին: Փառատոնը շատ արդյունավետ հարթակ է, որը հնարավորություն է տալիս գյուղացուն և արտադրողին վաճառել իր բերքը: Ժողովրդի կողմից նկատվում է ակտիվություն, ինչը տարեցտարի զգալիորեն աճում է, և փառատոնը վերածվում է ազգային համախմբության»,- ավելացրել է Է. Բարսեղյանը:
Քաշաթաղի շրջանի Քաշունիք համայնքի ղեկավար Լևոն Մովսիսյանն էլ նշել է, որ այս տարի ևս ներկայացրել են մերձարևադարձային մրգերից կիվանոն և ֆիզալիսը:
«Դրանք ամենամյա բույսեր են, որոնք աճեցվում են մեր համայնքում: Սերմերը բերել ենք դրսից: Նախորդ տարվա համեմատ՝ այս տարի ավելի շատ ենք ներկայացրել, քանի որ ավելացել են պատվերները: Տաղավարում ներկայացրել ենք նաև սերկևիլ, նուռ, արքայանարինջ, տանձի մի քանի տեսակ և այլ մթերքներ»,- ավելացրել է Լ. Մովսիսյանը:
«Ազատ Հայրենիք» կուսակցության երիտասարդական թևի անդամ Գոռ Բալասանյանն էլ նշել է, որ երրորդ տարին է, ինչ մասնակցում են «Բերքի տոն»-ին:
«Ներկայացրել ենք մեր երիտասարդ գյուղատնտեսների և մենատնտեսների արտադրանքը: Տոնի շնորհիվ երիտասարդ գյուղատնտեսներին ճանաչում են, և նրանք կարողանում են իրենց բերքը վաճառել: Տաղավարում առկա է հինգ տեսակի գինի, երեք տեսակի օղի, խոզի միս, խնձոր, նուռ և դդում: Գները իջեցրել ենք մոտ 10 տոկոսով»,- ասել է Գ. Բալասանյանը:
 
Բացի շրջանների գյուղական համայնքներից բերված բերք ու բարիքից, տեղական արտադրության մթերքների ցուցադրությունից, փառատոնին ներկայացվել է նաև հայկական մշակույթն իր բազմազանությամբ:
Ազգային երգ ու պարը ապահովել են ինչպես շրջանները ներկայացնող կատարողները, այնպես էլ «Մենք ենք մեր սարերը» երգի-պարի պետական համույթը, Ստեփանակերտի մանկապատանեկան ստեղծագործական կենտրոնի սաները, Արցախի պարի պետական համույթը, «Արցախի ձայներ» երաժշտական խումբը և «Մանկական Եվրատեսիլ 2018» երաժշտական մրցույթում Հայաստանը ներկայացնող փոքրիկ արցախցի L.E.V.O.N-ը:
 
«Բերքի տոն»-ին ներկա էին ԱՀ Ազգային ժողովի նախագահ Աշոտ Ղուլյանը, պետական նախարար Գրիգորի Մարտիրոսյանը, պաշտոնատար այլ անձինք, հյուրեր:

     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

Ես եմ «Բարձրացած բռունցք, Արցախ-Ղարաբաղ» գողացված տարբերանշանի իրական հեղինակը. Վահե Ֆատտալի բաց նամակը

«Ֆորբսը» հայուհուն ներառել է աշխարհի մինչև 30 տարեկան ամենաազդեցիկ մարդկանց ցանկում

Ստեփանակերտում խոշոր մարզահամալիր կկառուցվի. Արայիկ Հարությունյանը բարեգործական նոր ծրագրերի մասին է հայտարարել

Գյուղական համայնքներում տուն կառուցելու համար նոր փոխառություն կտրվի. պետնախարարը Կարմիր շուկայում խորհրդակցություն է անցկացրել

Վիրավորված եմ ինձ զգում Բելառուսի կողմից մեր պետությանը հասցրած վիրավորանքի համար. Արթուր Աղաբեկյան

Նիկոլ Փաշինյանն այցելել է մարտական հենակետ և հետևել մարտավարական զորավարժությանը

Ինչո՞ւ է հետաձգվել «Հին Երևան» նախագիծը. Արայիկ Հարությունյանը հետաքրքիր մանրամասներ է ներկայացրել

Մահացել է Արթուր Ապրեսովը

Իրանի հետ պատրաստ ենք երկկողմ հարաբերություններ հաստատել. Մասիս Մայիլյան

Search