24 տարի առաջ ստեղծվել է ՊԲ-ի առանցքային զորային միավորներից մեկը` առանձին տանկային զորամասը, որը, հետագայում վերակազմավորվելով, առայսօր հանդիսանում է ՊԲ-ի հզորագույն հարվածային ուժն ու հանրապետության ռազմապաշտպանական համակարգի կարևոր բաղադրիչներից մեկը:
ՊԲ-ում տոնել են տանկային զորամասի հերթական տարեդարձը
ՍՏԵՓԱՆԱԿԵՐՏ, հոկտեմբերի 19, ԱՐՑԱԽՊՐԵՍ-ՄԱՐՏԻԿ: Լավագույնի կոչման մշտական հասցեատերը ՊԲ-ում և զինված ուժերում, արդյունավետ մասնակցություն համաբանակային նշանակության և զինված ուժերի մակարդակով անցկացվող մրցումներին, ստանդարտներից դուրս և կրակային խոցման գերազանց արդյունքներով զորավարժություններ, փայլուն ցուցանիշներ` ստուգումների և համաբանակային նշանակության այլ միջոցառումների ժամանակ: Այս ամենը գնդապետ Թ. Հայրապետյանի հրամանատարությամբ գործող տանկային զորամասի անձնակազմի համար վաղուց դարձել է սահմանված նշաձող, որից այստեղ ոչ միայն երբևէ նահանջ չեն կատարում, այլև տարեցտարի բարձրացնում ու առավել բարձր մակարդակի են հասցնում:
Զորամասի դերն ու նշանակությունը լավ են հասկանում նաև ժամկետային զինծառայողները, ովքեր ուսուցանվել ու կրթվել են իրենց ավագ եղբայրների սխրանքներով ու նվաճումներով ոգևորված և այսօր վստահաբար ասում են, որ թե ուսումնական և թե իրական մարտադաշտում պատրաստ են կատարելու ցանկացած հրաման:
Տարիների հեռվից զորամասի նախկին փոխհրամանատար Կառլեն Մայիլյանը իրեն հպարտ ու երջանիկ է զգում, որովհետև նախորդ սերնդի ստեղծածը ավելի է կատարելագործվել: Զորամասը օրեցօր զինվում է նորագույն տեխնիկական միջոցներով և պատրաստ է կատարելու առավել բարդ մարտական առաջադրանքներ:
Օրվա առթիվ զորամասում կազմակերպվել է տոնական միտինգ, որին մասնակցել են նաև ենթաշեֆ դպրոցի աշակերտներն ու Ասկերանի մանկապատանեկան ստեղծագործական կենտրոնի սաները: Ելույթներով հանդես են եկել զորամասի նախկին զինծառայողներն ու վետերանները:
ՊԲ-ի և զորամասի հրամանատարների հրամաններով անձնակազմը խրախուսվել է դրամական միջոցներով, թանկարժեք նվերներով ու պատվոգրերով:
Հարություն Մկրտչյան
