ՍՏԵՓԱՆԱԿԵՐՏ, հոկտեմբերի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ փառատոնին շուրջ 90 տաղավարներում իրենց արտադրանքն էին վաճառքի հանել Մարտունու և հանրապետության մյուս շրջանների նռան մշակմամբ զբաղվող այգեգործներ ու վերամշակող կազմակերպություններ:

Միջոցառմանն Արցախի թեմի առաջնորդ Պարգև արքեպիսկոպոս Մարտիրոսյանը կատարել է նռան օրհնության արարողություն:

Այնուհետև ԱՀ Նախագահ Բակո Սահակյանը պաշտոնատար այլ անձանց ուղեկցությամբ շրջել է տաղավարներում, մասնակիցներից հետաքրքրվել այս տարվա բերքի արդյունքներով:

Մեզ հետ զրույցում ԱՀ գյուղատնտեսության նախարար Ժիրայր Միրզոյանն ասել է, որ նախորդ տարվա համեմատ՝ այս տարի զգալիորեն աճել է տաղավարների և փառատոնի մասնակիցների քանակը, ինչի շնորհիվ էլ կարելի է փառատոնը կայացած համարել:

«Նռան այգիները մեր հանրապետությունում հիմնադրված են հինգ՝ Ասկերանի, Հադրութի, Մարտակերտի, Մարտունու և Քաշաթաղի շրջաններում, սակայն գերակշիռ մասը գտնվում են Ասկերանի և Մարտունու շրջաններում: Նախորդ տարվա համեմատ՝ ընդհանուր առմամբ, նռան այգիների քանակն այս տարի  ավելացել է շուրջ 100 հա-ով: Այս պահի դրությամբ ունենք մոտ 1360 հա նռան այգիներ: Ներկայումս բերքահավաքն իրականացվում է 350 հա-ի վրա. շուրջ 1000 տոնա բերք է հավաքվել»,- նշել է Ժ. Միրզոյանը:

Գյուղատնտեսության նախարարի խոսքով՝ նռան պահանջարկ կա ինչպես Արցախում, այնպես էլ հանրապետությունից դուրս:

«Պետական ծրագրերն այդ ոլորտում այս տարի կապված էին կաթիլային համակարգերի տեղադրման հետ, որը բավականին մատչելի ծրագիր է հատկապես նորատունկ այգիների համար, քանի որ վերջիններիս համար տրամադրվում է 50 տոկոս դրամաշնորհ և 50 տոկոս փոխառություն: Կաթիլային համակարգով ոռոգվող տարածքները մոտ 270 հա են, սակայն այդ թիվն ունի ավելացման միտում»,- ընդգծել է Ժ. Միրզոյանը:

Իսկ Մարտունու քաղաքապետ Մհեր Խաչատրյանը նշել է, որ դեռևս 2017 թվականին քաղաքապետարանը ձեռնամուխ եղավ առաջին անգամ կազմակերպելու նռան փառատոն:

«Այս տարի մեր առաջարկությամբ փառատոնն ընդգրկվեց ամենամյա շրջանային միջոցառումների ծրագրի շրջանակներում և իրականացվեց Մարտունու շրջվարչակազմի հովանավորությամբ:

Նախորդ տարվա ներկայացրած 55 տաղավարների համեմատ՝ այս տարի այդ թիվն աճել է մոտ երկու անգամ, ինչը կապված է տարբեր շրջանների համայնքների մասնակիցների և վերամշակող կազմակերպությունների ավելացմամբ, որն ավելի գունագեղ է դարձնում միջոցառումը»,- ասել է Մ. Խաչատրյանը:

Նրա խոսքով՝  նուռը Մարտունու խորհրդանիշն է, քանի որ բնակլիմայական պայմանները և աշխարհագրական դիրքն առավել նպաստավոր են մրգի աճեցման համար:

«Շրջանում կա շուրջ 300 հա նռան այգիներ, ներկայումս էլ ակտիվ կերպով ընթանում են նոր այգիների հիմնման աշխատանքներ: Դրան նպաստել է 2017 թվականին «Հայաստան» համահայկական հիմնադրամի կողմից Մարտունու շրջանում խորքային հորերի հորատման ծրագիրը, և, բնականաբար, արտեզյան ջրհորների ավելացման հետ զարգանում են նաև նոր նռան այգիների ստեղծման աշխատանքները»,- նշել է Մ. Խաչատրյանը:

Մարտակերտի շրջանի Նոր Սեյսուլան համայնքից Արթուր Ոսկանյանն ասել է, որ փառատոնին ներկայացրել են հիմնական խորհրդանիշ նուռը, ինչպես նաև խնձոր, արքայանարինջ և կիվի:

«Այսօր նուռը վաճառում ենք շուկայականից համեմատաբար ցածր գնով՝ 300 դրամով: Մնացած տաղավարներում էլ նռան գինը տատանվում է 300-500 դրամի սահմաններում: Մեր մասնակցությունը փառատոնին լինելու է շարունակական, քանի որ սա հարթակ է, որտեղ նռան մշակությամբ և, ընդհանրապես, այգեգործությամբ զբաղվողները ներկայացնում են իրենց արտադրանքը: Օրինակ՝ կիվին, որի մշակմամբ արդեն զբաղվում ենք շուրջ 15 տարի, սպառվում է ավելի արագ»,- ասել է Ա. Ոսկանյանը:

Իսկ Մարտունի քաղաքից մենատնտես Ալեքսեյ Թունյանը նշել է, որ տևական ժամանակ է, ինչ զբաղվում է նռան մշակությամբ:

«Փառատոնին նուռը վաճառում ենք 350 դրամով: Այս տարի նռան մշակությունն ավելի դժվար էր, քանի որ  տարին չորային էր: Առհասարակ, Մարտունու տեղանքը հարմար է նռան մշակմամբ զբաղվելու համար, ինչի շնորհիվ էլ շրջանի բնակիչների հիմնական զբաղմունքը հենց նռան այգիներ հիմնելն է»,- ավելացրել է Ա. Թունյանը:

Փառատոնին Մարտունու, Մարտակերտի, Ասկերանի, Հադրութի, Շահումյանի և Շուշիի շրջանային համույթները հանդես են եկել մշակութային տարբեր կատարումներով:

Միջոցառմանը ներկա էին ԱՀ պետական նախարար Գրիգորի Մարտիրոսյանը, պաշտոնատար այլ անձինք, հյուրեր և այլք: