Այսօր՝ հոկտեմբերի 22-ին, Արցախի Հանրապետության Մարտունու շրջանի Շեխեր համայնքի և Ֆրանսիայի Առնուվիլ քաղաքի միջև ստորագրվել է Բարեկամության հռչակագիր:
Շեխեր համայնքի և Ֆրանսիայի Առնուվիլ քաղաքի միջև ստորագրվել է Բարեկամության հռչակագիր
ՍՏԵՓԱՆԱԿԵՐՏ, հոկտեմբերի 22, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Ֆրանսիայից ժամանած պատվիրակությանը ներկաները դիմավորել են աղուհացով:
Այնուհետև նրանք ծաղիկներ են խոնարհել արցախյան գոյապայքարում զոհված շեխերցի ազատամարտիկների հիշատակը հավերժացնող հուշարձանին:
Իր խոսքում Առնուվիլ քաղաքի քաղաքապետ Պասկալ Դոլլին ասել է, որ այս բարեկամությունը մեկ օրում չի ծագել և պետք է ավելի ընդլայնվի:
«Պատիվ ունենք ստորագրելու բարեկամության հռչակագիր Շեխեր համայնքի հետ: 1915 թվականի ողբերգական դեպքերից հետո մեծ թվով հայեր եկել և հաստատվել են Առնուվիլ քաղաքում, ու մեզ բախտ է վիճակվել ունենալ մեծ հայկական համայնք: Ինչպես Շառլ Ազնավուրը, այնպես էլ այդ հայերը 100 տոկոսով և՛ հայ են, և՛ ֆրանսիացի»,- նշել է Պասկալ Դոլլին:
Իր հերթին Շեխեր համայնքի ղեկավար Մխիթար Մանգասարյանը նշել է, որ ուրախ են հյուրընկալել Առնուվիլ քաղաքի պատվիրակությանը:
«Վստահ եմ, որ հռչակագրի ստորագրումը հնարավորություն կտա ամրապնդելու եղած բարեկամական կապերը, ավելի մոտիկից ճանաչել և սիրել միմյանց: Մարդկային շփումներից զատ՝ մենք կունենանք ընդհանուր հետաքրքրություն ներկայացնող բազմաթիվ ոլորտներ, որտեղ կարող ենք համագործակցել, կատարել փորձի փոխանակում, իրականացնել զարգացման համատեղ ծրագրեր»,- ավելացրել է Մ. Մանգասարյանը:
Ֆրանսիայի Ազգային ժողովի փոխնախագահ, «Ֆրանսիա-Արցախ» բարեկամության շրջանակի փոխնախագահ Ֆրանսուա Պուպոնին էլ նշել է, որ, ամեն անգամ գալով Արցախ, ինքը հիանում է՝ տեսնելով այստեղ ապրող ժողովրդի կամքը և ոգին:
«Արցախում ապրում է մի ժողովուրդ, որը պարզապես ունի մարդկային ամենաբարձր արժեքների սկզբունքը, այն է ապրել իր նախնիների երկրի վրա, խոսել մի լեզվով, հարգել իր մշակույթը, ապրել հավատքով: Այսօր այդ ժողովուրդը կանգնել է ոտքի և ցույց է տալիս, որ կարող է պաշտպանել իր հողը: Ինձ համար մեծ հպարտություն է գալ և ծանոթանալ այդպիսի մարդկանց հետ»,- ավելացրել է Ֆ. Պոպունին:
Իսկ Ֆրանսիայի Ազգային ժողովի նախկին պատգամավոր, «Ֆրանսիա-Արցախ» բարեկամության շրջանակի նախկին փոխնախագահ Ֆրանսուա Ռոշբլուանը նշել է, որ Առնուվիլի և Շեխերի միջև համագործակցության հռչակագիրն Արցախում 13-րդն է:
«Նման հռչակագրի ստորագրումը կարևոր է ոչ միայն Արցախի համայնքների, այլև Ֆրանսիայի քաղաքների համար: Մենք շարունակելու ենք մեր պայքարը, որպեսզի Արցախի անկախությունը մի օր ճանաչվի: Իմ առաջին այցից մինչ այսօր Արցախում զգալի փոփոխություններ են տեղի ունեցել, որոնք առաջիկայում պետք է շարունակվեն»,- ասել է Ֆ. Ռոշբլուանը:
Հանդիսավոր միջոցառմանը Շեխերի Նիկողոս և Հերմինե Նիկողոսյանների անվան միջնակարգ դպրոցի սաները հանդես են եկել երաժշտական կատարումներով և ասմունքով:
Հռչակագրի ստորագրմանը ներկա էին ԱՀ արտաքին գործերի նախարար Մասիս Մաիլյանը, ԱԺ պատգամավորներ, Ֆրանսիայից ժամանած հյուրեր և այլք:
