ԱՀ պետական բյուջեի և «Հայաստան» համահայկական հիմնադրամի համատեղ ֆինանսավորմամբ Ասկերանի շրջանի մի շարք համայնքներում իրականացվում է ջրամատակարարման համակարգերի բարելավման աշխատանքներ:
Ասկերանի շրջանում իրականացվում են ջրամատակարարման բարելավման աշխատանքներ
ՍՏԵՓԱՆԱԿԵՐՏ, հոկտեմբերի 23, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ասկերանի շրջվարչակազմի ղեկավար Գեղամ Բեգլարյանը:
Նրա խոսքով՝ այժմ ջրամատակարարման ծրագրեր են իրականացվում շրջանի Շոշ, Այգեստան, Սղնախ համայնքներում, որոնց աշխատանքներն ավարտին կհասցվեն 2019 թվականին: Իսկ Պատարա համայնքում իրակնացվող աշխատանքներն արդեն ավարտման փուլում են.մոտ օրերս այն շահագործման կհանձնվի:
Գ. Բեգլարյանը նշել է նաև, որ ջրամատակարարման հարցը միշտ էլ եղել է շրջվարչակազմի ուշադրության կենտրոնում և արվում է ամեն ինչ, որ շրջանի բոլոր բնակիչների ջրի խնդիրը լուծվի:
«Արցախում «Ֆրանսիայի բողոքական եկեղեցու և Հայաստանի միջև համերաշխություն» (SPFA) բարեգործական կազմակերպության միջոցներով շրջանի Աստղաշեն համայնքում սեպտեմբերի վերջին արդեն ավարտվել է նոր ջրագծի կառուցման աշխատանքը: Իսկ Դահրավ գյուղի ջրամատակարարման աշխատանքները լուծվում են իրենց համայնքի միջոցներով»,-տեղեկացրել է մեր զրուցակիցը:
