Ստեփանակերտի մշակույթի և երիտասարդության պալատում այսօր տեղի է ունեցել «ԱՀ անհայտ կորած ազատամարտիկների հարազատների միություն» (ԱԿԱՀՄ) հասարակական կազմակերպության գործունեության 20-ամյակին նվիրված միջոցառում:
Ստեփանակերտում նշվել է «ԱՀ անհայտ կորած ազատամարտիկների հարազատների միություն» ՀԿ-ի 20-ամյակը
ՍՏԵՓԱՆԱԿԵՐՏ, հոկտեմբերի 23, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել կազմակերպության նախագահ Վերա Գրիգորյանը:
Նա իր խոսքում ասել է, որ Արցախյան գոյամարտի տարիների ընթացքում հայի մեծանուն զավակները վտանգել են իրենց կյանքը, նրանք չեն վերադարձել՝ անհուն կսկիծ ու ցավ պատճառելով իրենց հարազատներին:
«Անցել են տարիներ, սակայն չի մարել հույսը, որ պիտի վերադառնան նրանք՝ անհայտության դատապարտված մեր որդիները, ամուսինները, եղբայրները, բարեկամներն ու դրացիները: Ցավը մեղմելու համար տարաբախտ ծնողներով միացել ենք և ստեղծել «ԱՀ անհայտ կորած ազատամարտիկների հարազատների միություն»-ը, որը մեծ առաքելություն է իրականցնում: Մեր հոգիներում խեղդելով կորստի ցավը, այս 20 տարիների ընթացքում հնարավոր բոլոր միջոցներն օգտագործել ենք որևէ լուր, տեղեկություն իմանալու նրանց մասին»,- մասնավորապես ավելացրել է Վ. Գրիգորյանը:
20-ամյակի կապակցությամբ իր օրհնանքի և սփոփանքի խոսքն է ասել Արցախի թեմի առաջնորդ Պարգև արքեպիսկոպոս Մարտիրոսյանը:
«Անհայտւթյան մեջ գտնվելը կրկնակի դժվարություն ու փորձություն է: Ստեղծելով այս կազմակերպությունը, անհայտ կորած ազատամարտիկների հարազատները, անթեղելով իրենց ցավը, աջակցում են ուրիշներին, մխիթարում վշտի մեջ գտնվողներին, օգնում կարիքավոր ընտանիքներին և այցելելով զորամասեր՝ գոտեպնդում զինվորներին»,- նշել է Պարգև արքեպիսկոպոս Մարտիրոսյանը:
Ըստ ահայտ կորած ազատամարտիկի դուստր Նազիկ Նալբանդյանի՝ Արցախի ժողովուրդը շարունակում է ապրել չավարտված պատերազմի, ոչ կայուն հրադադարի պայմաններում:
Նա բարձր է գնահատել կազմակերպության 20-ամյա գործունեությունը, որը անհայտ կորածների հարազատներին սփոփանք, հույս ու հավատ է ներշնչում:
Ն. Նալբանդյանը անհայտ կորածների հարազատներին մաղթել է միշտ լինել ուշեղ, ունենալ կամքի ուժ՝ դիմակայելու կորստյան ցավին և ապրել հանուն հայրենիքի ապագայի:
Երեկոյին հնչել է նաև ԱՀ նախագահ Բակո Սահակյանի, ԱՀ պաշտպանության նախարար Լևոն Մնացականյանի և Արարատի քաղաքապետի օգնական Գառնիկ Մարգարյանի շնորհավորական ուղերձները:
Ելույթներով հանդես են եկել նաև Ստեփանակերտի Աշոտ Ղուլյանի անվան N2 հիմնական դպրոցի տնօրեն Լաուրա Մարտիրոսյանը, «Կաճառ» գիտական կենտրոնի նախագահ Մհեր Խաչատրյանը և զոհված ազատամարտիկների միության նախագահ Արթուր Առստամյանը:
Միջոցառմանը «ԱՀ անհայտ կորած ազատամարտիկների հարազատների միություն» ՀԿ-ի հետ ակտիվ համագործակցության համար Վ. Գրիգորյանը «Հայրենիք և հավատ» մեդալով պարգևատրել է մի շարք անձանց, իսկ ՀՀ «Զինվոր» ՀԿ-ների համակարգող խորհրդի «Զինվոր հայրենյաց» մեդալով պարգևատրել է ԱՀ նախագահի խորհրդական, «ԱՀ անհայտ կորած ազատամարտիկների հարազատների միություն» ՀԿ-ի պատվավոր անդամ, միության կողմից իրականացվող ծրագրերի աջակից Գրիգորի Գաբրիելյանցին:
«ԱՀ անհայտ կորած ազատամարտիկների հարազատների միություն» կազմակերպության պատվավոր անդամի կոչում է շնորհվել Սիսիանի պատմաերկրագիտական թանգարանի տնօրեն Ծովինար Պետրոսյանին:
Միջոցառման վերջում համերգային ծրագրով հանդես է եկել ԱՀ պաշտպանության բանակի «Ասպետ» համույթը:
Միջոցառմանը ներկա էին ԱՀ Ազգային ժողովի նախագահ Աշոտ Ղուլյանը, պաշտոնատար այլ անձինք, անհայտ կորած ազատատամարտիկների հարազատներ և այլք:
