ԱՀ նախագահի կողմից տրված հանձնարարականի համաձայն` արդեն մի քանի ամիս է, ինչ զբաղվում ենք բնակարանաշինության և հիփոթեքային աջակցության ծրագրերի վերանայման, բարելավման և բարեփոխման հարցերով:
Արցախում կներդրվի բնակարանաշինության և հիփոթեքի նոր ծրագիր. մանրամասնել է պետնախարարը
«2019 թվականից սկսած` բնակարանաշինության ոլորտում կունենանք նոր մոտեցումներ, որոնք դրական կանդրադառնան ինչպես Ստեփանակերտ քաղաքի, այնպես էլ գյուղական և մնացած քաղաքային համայնքների բնակիչների համար մատչելի պայմաններ ստեղծելուն: ԱՀ նախագահի մոտ քննարկել ենք մի քանի կարևոր փոփոխություններ՝ կապված պետության կողմից ստանձնած մեր քաղաքացիների որոշակի խմբերի բնակարանային ապահովության հարցերի վերանայմանը, ինչպես նաև կանոնակարգման փոփոխություններին: Դրանք նույնպես մինչև տարվա վերջ ԱՀ Կառավարության կողմից կընդունվեն և կսկսեն գործել 2019 թվականից»,- ասել է պետական նախարարը:
Գ. Մարտիրոսյանի խոսքով՝ մշակվել են նաև բնակարանաշինության երկու նոր նախագծեր, որոնք կիրագործվեն Ստեփանակերտում: Առաջիկայում այդ նախագծերը կներկայացվեն հանրությանը: Դրանք լինելու են մատչելի արժեքով սոցիալական բնակարաններ՝ սահմանափակ բնակտարածքով:
«Հանրապետության նախագահին ներկայացրել ենք հիփոթեքային գործող կարգում որոշակի փոփոխություններ կատարելու առաջարկներ, որոնք ավելի մատչելի կլինեն բնակիչներին: Նախատեսվում է նաև որոշակի սուբսիդավորման մեխանիզմների վերանայում: Օրինակ՝ ընտանիքում յուրաքանչյուր երեխայի ծննդյան կապակցությամբ կատարվելու է սուբսիդավորման ավելացում:Նախատեսվում է նաև բնակարանաշինության ապահովման մատչելիությունը բարձրացնել ոչ միայն լրացուցիչ սուբսիդավորմամբ, այլև սոցիալական բնակտարածքների ստեղծման միջոցով՝ ընդհանուր բնակարանային ֆոնդի էժանացման հիման վրա: Ինչպես նաև նախատեսվում է վերանայված պայմանների գործողությունների տարածում նախկինում հիփոթեք ձևակերպած քաղաքացիների վրա, դրանք ևս համապատասխանեցնելով նույն չափանիշներին»,- տեղեկացրել է Գ. Մարտիրոսյանը և ավելացրել, որ ծրագրից հնարավորություն կունենան օգտվել բոլոր քաղաքացիները: