Կրթության առանձնահատուկ պայմանների կարիք ունեցող երեխաների խնդիրների վերաբերյալ տեղի է ունեցել խորհրդակցություն
ԱՀ կրթության, գիտության և սպորտի նախարարության (ԿԳՍ) և «Հույսի կամուրջ» հասարակական կազմակերպության համատեղ նախաձեռնությամբ Ստեփանակերտի «Վալլեքս գարդեն հոթել» հյուրանոցային համալիրում այսօր տեղի է ունեցել «Ներառական կրթությունը կրթության բարեփոխումների կարևոր մաս» խորագրով ընդլայնված կազմով խորհրդակցություն:
Կրթության առանձնահատուկ պայմանների կարիք ունեցող երեխաների խնդիրների վերաբերյալ տեղի է ունեցել խորհրդակցություն
ՍՏԵՓԱՆԱԿԵՐՏ, 1 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ կրթության, գիտության և սպորտի նախարար Նարինե Աղաբալյանը: Նա կարևորել է նման ձևաչափով խորհրդակցության անցկացումը և հույս հայտնել, որ այն կլինի արդյունավետ և օգտակար:
Նախարարի խոսքով՝ մինչև 2025 թվականը ԱՀ-ում պետք է անցում կատարվի ներառական կրթության: Դրա համար անհրաժեշտ է հստակեցնել ու հասկանալ ոլորտի խնդիրները և մշակել հետագա ռազմավարությունը:
«Մեր դիտարկումները թույլ են տվել եզրահանգելու, որ ներառական կրթության հիմնական խոչընդոտներից մեկը հանրության կողմից հարցի ոչ այնքան ճիշտ ընկալումն է: Այս խնդրի լուծումը հնարավոր է իրականացնել իրավական դաշտում, սակայն այն առաջին հերթին ենթադրում է մտածելակերպի փոփոխություն, որի համար պետք է բոլոր տնօրենների և ուսուցիչների համար կազմակերպվի վերապատրաստման դասընթացներ: Դպրոցում կրթության առանձնահատուկ պայմանների կարիք ունեցող (ԿԱՊԿՈՒ) երեխաների խնդիրը միայն ծնողի կամ մասնագետի խնդիրը չէ, այլ ողջ հասարակության: Այս ոլորտում ակնկալում ենք սերտ համագործակցություն բոլոր շահագրգիռ կողմերի հետ»,-ասել է Ն. Աղաբալյանը:
Նա նշել է նաև, որ Արցախում ԿԱՊԿՈՒ երեխաների ծնողներն ստեղծել են «Ելարան» հասարակական կազմակերպություն, որտեղ իրենց կողմից ոլորտի խնդիրները կներկայացվեն և համատեղ աշխատանքի արդյուքում կտրվեն լուծումներ:
Ըստ Ն. Աղաբալյանի՝ ներառական կրթությունը ներառական հասարակության հիմքն է, որի համար պետք է անհրաժեշտ պայմաններ ստեղծել:
«Շնորհիվ «Հույսի կամուրջ» ՀԿ-ի՝ մենք պետք է համագործակցենք միջազգային կառույցների հետ: Ունենք որոշակի ակնկալիքներ Արցախում համապատասխան մանկավարժահոգեբանական կենտրոնի ստեղծման ուղղությամբ: Եթե հնարավորություն ունենաք ստանալ դրամաշնորհ, ապա պետական համաֆինանսավորմամբ կկարողանանք ստեղծել այդ կենտրոնը»,-ավելացրել է նախարարը՝ տեղեկացնելով, որ առաջիկայում կստեղծվի կրթության առանձնահատուկ պայմանների կարիք ունեցող երեխաների հետ տարվող աշխատանքների քաղաքականության իրականացման միջգերատեսչական հանձնաժողով, որի նպատակն է լինելու ԿԱՊԿՈՒ երեխաների խնդիրներին վերաբերող հայեցակարգային նոր մշակումը և հետագա քայլերի կիրառումը:
Խորհրդակցությանը մասնակից «Հույսի կամուրջ» ՀԿ նախագահ Սուսաննա Թադևոսյանն ասել է, որ միջոցառման նպատակն այն է, որ ԿԱՊԿՈՒ երեխաների խնդիրներին մոտենանք իրավունքի տեսանկյունից, որպեսզի կրթական համակարգը կարողանանք դարձնել իսկապես հասանելի և մատչելի յուրաքանչյուրի համար:
«Երեխայի ունեցած որևէ ֆիզիկական կամ մտավոր բարդություն չպետք է համարենք կրթության մեջ չներառելու պատճառ:
Այս տեսլականով է արվել օրենսդրական այն փոփոխությունները, որը տալիս է ամբողջ հիմքերն էականորեն բարելավելու կրթության ոլորտը: Իմ կարծիքով, շատ կարևոր է ստեղծել միջգերատեսչական հանձնաժողով, որովհետև բոլոր ոլորտների ներկայացուցիչներն ունեն երեխայի իրավունքի լիարժեք իրացման համար պատասխանատվություն:
Մենք միայն համատեղ քննարկման արդյունքում կարող ենք խնդիրներին տալ ճիշտ լուծումներ»,-նշել է Ս. Թադևոսյանը:
ԱՀ ԿԳՍ գնահատման և թեստավորման կենտրոնի մանկավարժահոգեբանական աջակցության բաժնի պետ Հասմիկ Եսայանը, խոսելով «Ներառական կրթության գործընթացն Արցախում՝ իրավիճակը և խնդիրները» թեմայի մասին, նշել է, որ իրենց բաժինը 2013 թվականից զբաղվում է կրթության առանձնահատուկ պայմանների կարիք ունեցող երեխաների խնդիրներով:
«Բոլոր երեխաների համար մենք պետք է հարմարեցնենք կրթական համակարգը, հասարակական միջավայրը, կրթօջախների շենքային պայմանները: Այս 5 տարիների ընթացքում մեծ թվով երեխաներ հնարավորություն են ստացել սովորել դպրոցներում, երեխաների մի մասն էլ, ովքեր ժամանակին շատ ճնշված էին, այժմ լրիվությամբ հարմարվել են հասարակական նոր միջավայրին: ԿԱՊԿՈՒ երեխաները դասապրոցեսի ընթացքում խոչընդոտ չեն հանդիսանում մյուս երեխաների կամ ուսուցիչների համար:Մենք պետք է կարողանանք հասկանալ, որ յուրաքանչյուր երեխայի պետք է յուրովի մոտեցում ցուցաբերել: Ներկայումս ԱՀ-ում ունենք 467 այդպիսի երեխա: Յուրաքանչյուր հասարակության մեջ 10-15%-ն ունի նման խնդիրներ: Արցախի շրջանների մի մասում ներկայումս հայտնաբերվել են նման երեխաներ, բայց ունենք շրջաններ, որտեղ դեռևս այդ ուղղությամբ աշխատանքներ ենք իրականացնում»,-մասնավորապես ասել է Հ. Եսայանը:
Կրթության ոլորտի փորձագետ Անահիտ Բախշիյանի խոսքով՝ ներկայումս յուրաքանչյուր ոք կրթություն ստանալով է հասնում լուրջ հաջողոթւյունների: Հաշվի առնելով այդ ամենը, կրթությունը պետք է լինի յուրաքանչյուր երեխայի կարողությանը համապատասխան:
Ելույթներից հետո թեմայի վերաբերյալ մասնակիցները բարձրացրել են հարցեր, արտահայտել տեսակետներ, հանդես եկել առաջարկներով:
Միջոցառմանը մասնակցում էին նաև ԱՀ ԿԳՍ նախարարության աշխատակիցներ, ԱՀ առողջապահության նախարար Արայիկ Բաղրյանը, ԱՀ աշխատանքի, սոցիալական հարցերի և վերաբնակեցման նախարար Սամվել Ավանեսյանը, ԱՀ մարդու իրավունքների պաշտպան Արտակ Բեգլարյանը, ԱՀ Ազգային ժողովի պատգամավորներ, հասարակական կազմակերպության ներկայացուցիչներ և այլք: