ՍՏԵՓԱՆԱԿԵՐՏ, 7 նոյեմբերի, ԱՐՑԱԽՊՐԵՍ: «Արցախպրես»-ի  թղթակցի  հաղորդմամբ՝  միջոցառմանը  բացման   և  շնորհավորական   խոսքով  հանդես  է  եկել   երաժշտական   դպրոցի  տնօրեն   Արթուր  Պետրոսյանը:

Նա  ասել  է, որ  դպրոցը   ստեղծվել  է  1938  թվականին:  Անցած  80  տարիների  ընթացքում կրթօջախը հազարավոր  աշակերտներ  է  կրթել  ու  դաստիարակել՝ նրանց  մեջ   ձևավորելով    ու   զարգացնելով  արվետսի  նկատմամբ     բարձր   ճաշակ:

«Դպրոցի   ստեղծման    առաջին  տարում  այստեղ  ուսում  է   ստացել  38  աշակերտ: Տարեցտարի  դպրոց  հաճախող  երեխաների  թիվն  աճում  է: Այսօր   արդեն  ունենք  587  աշակերտ: Դպրոցի   շենքը   կառուցվել  է  2015  թվականին: Արվեստի  այս  կրթօջախում  գործում  է  դաշնամուրային, լարային, փողային-հարվածային, թեորյայի, վոկալ-երգչախմբային  բաժիններ: Ունենք  երգեցողության  երեք  ուղղություն՝ դասական, ժողովրդական  և  էստրադային: Մեզ մոտ  գործում  է  ջութակահարների  համույթ, ինչպես  նաև երեք  երգչախումբ՝  կրտսեր, միջին  և  ավագ տարիքների: Բաժինների  ուսուցիչներն  անում  են   հնարավոր  ամեն ինչ՝   գրագետ  ու զարգացած  սերունդ կրթելու  և դաստիարակելու  համար: Դպրոցի  սաները  մասնակցում  են    միջազգային  տարբեր մրցույթ-փառատոնների, որտեղ ցուցաբերում  են լավագույն  արդյունքները»,-մանրամասնել  է  Ա. Պետրոսյանը:

Միջոցառմանը   ներկա  ԱՀ  մշակույթի, երիտասարդության  հարցերի  և  զբոսաշրջության  նախարար  Լեռնիկ  Հովհաննիսյանը   ևս   շնորհավորել  է   կրթօջախի  80-ամյակը  և  ասել, որ  Ստեփանակերտի   Կոմիտասի  անվան  երաժշտական  քոլեջը   մշակութային  կրթության    համար     շատ  մեծ   նշանակություն   ունի:

Ըստ   նախարարի՝   կրթօջախը   պետք է  և  պարտավոր  է   իրեն  դրսևորի     մեծն  երգահան  Կոմիտասի  անվանը  հարիր: Հաջորդ  տարի   կլրանա   մեծն  Կոմիտասի   ծննդյան  150-ամյակը, որտեղ  դպրոցի  ուսուցիչներն  ու   աշակերտները   պետք  է  ձգտեն  ըստ  արժանվույն  ներկայացնել  կրթօջախը:

 

Ստեփանակերտի  քաղաքապետ  Սուրեն  Գրիգորյանն  էլ  ասել է, որ   8 տասնամյակ  շարունակ   դպրոցը  թողարկել  է  աշակերտներ, որոնց  մի  մասն  իր  կրթությունը  շարունակել  և  շարունակում    է     երաժշտական  հաստատություններում: Նրանց   մի  մասը    նշանակալի   դեր  են  խաղում  հայ  մշակույթի  գործում:

«Մենք  պարտավոր  ենք  մեր    նախնիների  ստեղծած  մշակութային,  հոգևոր   և  նյութական  արժեքները  պահպանել, հարստացնել  ու  փոխանցել    եկող  սերունդներին: Այսօր  էլ  Արցախի  իշխանությունները  շարունակում են  իրենց  ուշադրության  կենտրոնում  պահել   մշակույթային    ոլորտի   զարգացման հարցերը՝  կառուցելով  երաժշտական նոր  դպրոցներ և  մշակութային  օջախներ, ձեռք  բերում  համապատասխան  երաժշտական  գործիքներ  և  այլն»,-մասնավորապես  ասել է   Ս. Գրիգորյանը:

Մշակույթի  և  արվեստի   բնագավառում  ունեցած    վաստակի  և  Ստեփանակերտի  Կոմիտասի  անվան  երաժշտական  դպրոցի  ստեղծման  80-ամյակի    կապակցությամբ ԱՀ  մշակույթի, երիտասարդության  և  զբոսաշրջության   նախարար  Լեռնիկ  Հովհաննիսյանը, Ստեփանակերտի  քաղաքապետ  Սուրեն  Գրիգորյանը  և  երաժշտական  դպրոցի  տնօրեն  Արթուր  Պետրոսյանը   կրթօջախի   մի   խումբ   ուսուցիչների  խրախուսել  են    պատվոգրերով, շնորհակալագրերով   և   դրամակ    պարգևներով:

Միջոցառման վերջում    ներկաները    շրջել  են   դպրոցի  ցուցասրահով  և   լուսանկարների  միջոցով   ծանոթացել    կրթօջախի    80-ամյա  տարեգրությանը: