Գրիգոր Նարեկացի համալսարանում կայացել է Արցախյան շարժման 30-ամյակին նվիրված գրքի շնորհանդես
ԱՀ գրողների միության և Գրիգոր Նարեկացի համալսարանի պատմության ամբիոնի համատեղ նախաձեռնությամբ, այսօր բուհի պոեզիայի և գիտական նիստերի դահլիճում կայացել է Նաիրա Առստամյանի «Տագնապալից և փոթորկածին օրեր» գրքի շնորհանդեսը՝ նվիրված Արցախյան շարժման 30-ամյակին:
Գրիգոր Նարեկացի համալսարանում կայացել է Արցախյան շարժման 30-ամյակին նվիրված գրքի շնորհանդես
ՍՏԵՓԱՆԱԿԵՐՏ, 8 նոյեմբերի, ԱՐՑԱԽՊՐԵՍ: Գրքում տեղ են գտել հեղինակի տարբեր տարիների մամուլում լույս տեսած թղթակցությունները, որոնք մեծամասամբ Արցախյան շարժման և պատերազմի տարիների տարեգրություններ են: Կան նաև դպրոցական կյանքն արտացոլող և կյանքի տարբեր բնագավառներին առնչվող բազմապիսի հետաքրքիր նյութեր:
«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ գրողների միության նախագահ Վարդան Հակոբյանը:
Նա ասել է, որ գրքում տեղ են գտել Արցախյան պատերազմի տարեգրության հետաքրքիր դրվագներ:
«Այս գիրքն իր աղբյուրագիտական նշանակությամբ տարիներ հետո համարվելու է գրական գոհարներից մեկը: Ն. Առստամյանը կարողացել է և՛ ականատեսի վկայությմաբ և՛ իր ձիրքով ներկայացնել պատերազմական իրավիճակն այնպես, ինչպես այն եղել է: Այս գրքում բավականին հետաքրքիր ձևով է արծարծված հայ մարդու ամբողջական կերպարը:
Լինելով Մարտակերտի շրջանի Վերին Հոռաթաղի դպրոցի նախկին տնօրեն՝ գրքի հեղինակը գրել է նաև պատերազմի դաշտում զոհված իր աշակերտների մասին»,-մասնավորապես ասել է Վ. Հակոբյանը:
Գրիգոր Նարեկացի համալսարանի պատմության ամբիոնի վարիչի տեղակալ Ալիկ Սարգսյանն իր ելույթում շորհակալությունն է հայտնել Ն. Առստամյանին, Արցախյան շարժմանը նվիրված գրքի լույսընծայման համար, և նշել, որ գրքում զետեղված են շատ կարևոր խնդիրներ, որոնք այսօր էլ արդիական են:
«Հեղինակը հետաքրքիր ձևով է ներկայացրել Վերին հոռաթաղցիների մասնակցությունն Արցախյան պայքարին, մասնավորապես, ընդգծելով կանանց դերը: Մասնագիտությամբ չլինելով պատմաբան՝ հեղինակը շատ հստակ ներկայացրել է արցախյան շարժման տարիներին գյուղական և դպրոցական կյանքի առօրյան: Հավատացած եմ, որ այն մեծ հետաքրքրությամբ կընթերցեն երիտասարդները: Գիրքը մեծ ազդեցություն կունենա նրանց աշխարհայացքի ձևավորման գործում»,-նշել է Ա. Սարգսյանը:
Բանաստեղծուհի Սոնա Համբարձումյանի խոսքով՝ «Տագնապալից և փոթորկածին օրեր» գիրքը հեղինակի ապրած օրերի, հույզերի, ընդվզումների համալիր շարադրանք է:
Ըստ Ս. Համբարձումյանի՝ գիրքն իր անկեղծ բովանդակությամբ կարողանում է հավերժության զգացում փոխանցել ընթերցողին: Հեղինակն այս գրքում իր հուշապատումների, հոդվածների միջոցով տեսանելի ու պարզ է դարձրել ժամանակաշրջանը, տիրող իրավիճակը, ինչն էլ ազնիվ և հետաքրքրական պատկեր է ստեղծոել ընթերցողի մոտ:
Գրքի հեղինակ Նաիրա Առստամյանն ասել է, ինքը դեռևս դպրոցական տարիներին թղթակցել է շրջանային, հանրապետական, մասնագիտական, երգիծական թերթերի և ամսագրերի, հրապարակել է հասրակական-քաղաքական, հայրենասիրական, բարոյա-էթիկական, դպրոցական, Արցախյան շարժման և պատերազմի թեմաներ, որոնց մի մասը չի պահպանվել:
«Ունեի նաև էսքիզներ, պատմվածքներ, բանաստեղծություններ, բազմաթիվ նամակներ: Շարժման տարիներին համարձակորեն արձագանքում էի բոլոր դեպքերին: Խնդրում եմ ընթերցողներին՝ կարդալուց ուշադրություն դարձնել թղթակցության տարեթվերին, որովհետև, այն, ինչ ես խիզախում էի տարիներ առաջ, այժմ սովորական է մարդկանց համար: Այս գիրքում տեղ են գտել տարբեր տարիների իմ հրապարակած հոդվածները, ձեռագիր փաստերը և լուսանկարները»,-մասնավորապես ավելացրել է Ն. Աստամյանը:
Շնորհանդեսին ելույթներով հանդես են եկել նաև «Լուսարար» թերթի խմբագիր Սվետլանա Խաչատրյանը, ԱՀ գրողների միության անդամներ, ուսանողներ, գրքի հեղինակի հարազատները: