Artsakhpress

Հասարակական

Ստեփանակերտում կազմակերպվել է «Արցախի գիտության ներկան ու ապագան» թեմայով կլոր սեղան

Նոյեմբերի 10-ը օրացույցում նշանավորվում է որպես Գիտության համաշխարհային օր, որի կապակցությամբ «Արցախի Երիտասարդ Գիտնականների և Մասնագետների Միավորում» (ԱԵԳՄՄ) հասարակական կազմակերպությունը նախաձեռնել էր «Արցախի գիտության ներկան ու ապագան» թեմայով կլոր սեղան-քննարկում:

Ստեփանակերտում կազմակերպվել է «Արցախի գիտության ներկան ու ապագան» թեմայով կլոր սեղան

Ստեփանակերտում կազմակերպվել է «Արցախի գիտության ներկան ու ապագան» թեմայով կլոր սեղան
ՍՏԵՓԱՆԱԿԵՐՏ, 11 նոյեմբերի, ԱՐՑԱԽՊՐԵՍ: Ինչպես «Արցախպրես»-ին տեղեկացրին «Արցախի Երիտասարդ Գիտնականների և Մասնագետների Միավորում» (ԱԵԳՄՄ) հասարակական կազմակերպությունից, քննարկմանը մասնակցում էին ԱԺ պատգամավորներ, ԿԳՍ ներկայացուցիչ, Արցախում գործող բուհերի ռեկտորներ, պրոռեկտորներ, Արցախի գիտական կենտրոնի ղեկավարությունը, ԱԵԳՄՄ անդամներ, ուսանողներ և հյուրեր:
Բացելով միջոցառումը՝ ԱԵԳՄՄ հիմնադիր նախագահ, ի.գ.թ., դոցենտ Ավետիք Հարությունյանը կարևորել է օրվա խորհուրդը, ապա  ներկայացրել քննարկման օրակարգն ու հիմնավորել վերջինիս օրախնդրային լինելը:
«Հաշվի առնելով օրվա խորհուրդն ու կարևորությունը մեր հասարակության և հատկապես նրա գիտական շրջանակների համար՝ Կազմակերպությունը նախաձեռնել է կլոր սեղան-քննարկում՝ նպատակ ունենալով բացահայտել գիտությամբ զբաղվող երիտասրդների հիմնախնդիրները, առաջարկել դրանց լուծման ուղիները, ուղղորդել երիտասարդ գիտնականների ներուժը պետական և մասնավոր հատվածում»,- նշում է Ա. Հարությունյանն ու հավելում, որ նպատակ ունեն ձեռնամուխ լինելու Արցախի Հանրապետությունում գիտության զարգացման հայեցակարգի մշակման աշխատանքներին:
Նախքան քննարկմանն անցնելը ներկայացվել են Արցախում գործող երիտասարդ գիտնականների հիմնախնդիրների և դրանց լուծման հնարավոր ուղիների վերաբերյալ Կազմակերպության կողմից իրականացված հետազոտության արդյունքները:
«Դիտարկելով Արցախում գիտության հիմնախնդիրները, այն խթանող և խափանող հանգամանքները՝ հարցման արդյունքում ստացված տվյալների վերլուծությունից պարզ է դառնում, որ Արցախում գործող երիտասարդների հիմնախնդրային դաշտը պայմանավորվում է պետական համապատասխան քաղաքականության բացակայության հետևանքով ի հայտ եկած գործոններով, որոնք կարող են շտկվել բացառապես հստակ մեխանիզմների ներդրմամբ»,- հետազոտության արդյունքներն ամփոփում է ԱԵԳՄՄ անդամ Անուշ Դոլուխանյանը:
Անդրադառնալով Արցախում գիտահետազոտական (ուղեղային) կենտրոնի, գիտական հիմնադրամների ստեղծման անհրաժեշտության, գիտությամբ զբաղվող երիտասարդների գիտական գործուղումների, երիտասարդական գիտական միջոցառումների ֆինանսավորման, սարքերի կամ նյութերի ձեռքբերման, երիտասարդ գիտնականների և մասնագետների վերապաստրաստման ու որակավորման բարձրացման, գիտահետազոտական դրամաշնորհների հատկացումների, համագործակցության և միջազգային գիտական միջոցառումներին արցախցի երիտասարդների ներգրավվածության խնդիրներին՝ կլոր սեղանի մասնակիցները միանշանակ հաստատել են դրանց արդիականությունը և առաջադրել դրանց լուծման ուղիների սեփական տեսլականները:
Շուշիի տեխնոլոգիական համալսարանի ռեկտոր Հովհաննես Թոքմաջյանը գտնում է, որ «գիտության գրավչությունը ազատության մեջ է»՝ նկատի ունենալով նաև նյութական ազատությունը, իսկ թե ինչպես պետք է գիտնականն իրացնի գիտական արտադրանքը, ավագ սերունդը համակարծիք է: «Գիտությունը չպետք է առևտրայնացնել. գիտությունը և կոմերցիան միմյանց հակասող հասկացություններ են»,- ասում է ԱՀ Նախագահի խորհրդական, տնտեսագիտական վարչության պետ Կարեն Ներսիսյանը:
Օրենսդիր մարմնի ներկայացուցիչները ոչ միայն բարձր գնահատեցին ԱԵԳՄՄ հիմնավոր փաստարկներն ու պահանջները, այլև պատրաստակամություն հայտնեցին աջակցելու նրա օրենսդրական նախաձեռնությունը՝ ըստ կարգի ԱԺ-ում քննարկելու և ընթացքավորելու հարցում:
«Անհրաժեշտ է պետբյուջեի քննարկումներից առաջ մշակել և ներկայացնել ծրագիր, որպեսզի բարձրացված հարցերը, որոնք առավելապես ֆինանսական լուծման տիրույթում են, լիազոր մարմնի միջնորդությամբ ընդգրկվեն ոլորտի համար նախատեսվող բյուջեում»,- առաջարկում է ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամ Վարդգես Բաղրյանը:
Հաշվի առնելով հետազոտության արդյունքները, քննարկվող հարցերի վերաբերյալ հնչեցված առաջարկություններն ու դիտարկումները՝ ԱԵԳՄՄ-ն նախատեսում է մշակել և պատկան մարմինների քննարկմանը ներկայացնել գիտության զարգացման հայեցակարգի նախագիծ, ինչպես նաև «Արցախի Հանրապետությունում երիտասարդ գիտնականներին պետական աջակցության մասին» օրենքի նախագիծը:

     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

Երկրաշարժ՝ Արցախում. ցնցման ուժգնությունն էպիկենտրոնում կազմել է 4 բալ

Հրազենային վիրավորում ստացած պայմանագրային զինծառայողը մահացել է

Լիբիայի ժամանակավոր կառավարությունը ճանաչեց Հայոց ցեղասպանությունը

Ստեփանակերտում տեղի է ունեցել Մաղավուզի հանքանյութից ստացված նավթամթերքի շնորհանդեսը (տեսանյութ)

Համահայկական խաղերի բացումը կլինի Ստեփանակերտում

Թուրքիայի միակ հայկական գյուղում կբացվի երկրի միակ հայկական թանգարանը

Ստեփանակերտում կազմակերպվել է ջահերթ. մասնակիցները պահանջում են Հայոց ցեղասպանության միջազգային ճանաչում (լուսանկարներ)

Ստեփանակերտի Աստվածամոր Սուրբ Հովանի Մայր Տաճարի բակում կազմակերպվելու է Սուրբ Զատկի տոնին նվիրված միջոցառում

Ուսուցիչների աշխատավարձերի բարձրացման հարցը քննարկման փուլում է. Նարինե Աղաբալյան

Search